كل عام وانت بخير

بمناسبة عيد الأضحى المبارك احب اقول لكم كل عام وانت

بألف خير وانشالله ربي يعيده على الأمة الإسلامية بالفرح

والمسرات..و بمناسبة العيد أحب أشكر كل من شارك بتعليقاته

الجميلة في المدونة و كل عام وانتم بخير

كلمات

مبدأ هذا الزمن:

أخبرني كم رصيدك..اخبرك من انت

الحب:

كلمة بسيطة ضاعت بين مجموعة من الكلمات

الصاحب الوفي:

مجرد كلمة نسمعها.. بس ما نشوفها

السفر في الصيف:

كان واقع ولكن صار حلم بسقوط الأسهم

الزواج:

الشباب يسمع عنه بس ما يفكر فيه

لحظة غروب

لحظة غروب الشمس..على شط البحر..

البنت تبني قصر من الرمال مع ابوها..و الولد

يسبح مع عمه و خاله..

الأم تتكلم مع زوجة ولدها بكل حنان الأمومة..

تغرب الشمس.. و الكل يقوم لصلاة المغرب..

الكل عايش في الفة و تفاهم..

العائلة مجتمعة في كل وقت.. بدون حواجز..بدون مجاملات.

الكل قلوبهم على بعض..

هذا شي كان عندنا من زمان..اسمه الترابط الأسري..

ياليته في يوم يعود…

واجب اسراء

اليوم وانا أقرا مدونة الأخت اسراء.. لقيتها بتتكلم عن

واجب طلبه منها الأخ رائد.. وهي بدورها طلبت نفس

الشي من كثير من الأخوان بأنهم يعملوا نفس الشي

ويجاوبوا على الأسئلة.. وانا تفاجأت و فرحت لما لقيت

اسمي بينهم..و ما حبيت ازعلها لانها من الناس المهمين

اللي بيكتبوا في مدونتي ولها مشاركات مرة حلوة..

واليكم اجوبتي..

 اسمي: محمد بن سالم

اسم الشهرة : …………

العمر: 31 سنه

برجي: العذراء

شهادتي: بكالريوس ادارة اعمال

معنى السفر عندي: تغير جو وبعد عن جو العمل

شخصيتي: رايق و رزين

المزاج : صعب للغاية

المشتريات بالنسبة لي: شي حلو

 يومي خارج وقت الذروة : مع اعز الأصحاب ..بندر

الصفة المأخوذة من والدي: الصبر والحكمة والاحساس بالمسؤولية

الصفة المأخوذة من امي: الطيبة والحرص

الشيطان و المرأة

قال احد العلماء: يحتاج الشيطان الى مئة دقيقة للضحك على الرجل…

و المرأة تحتاج الى دقيقة لتضحك على مئة رجل..

عيال حارتنا

اليوم نزل البوم علي بن محمد الجديد واسمه عيال حارتناالألبوم حلو ولا يفوتكم

ليش يحشون الحريم في بعض؟؟

سؤال من جد محيرني و قاهرني في نفس الوقت ، ليش البنات والحريم

 يحشون في بعض حتى لو كانت من اقرب الناس لها؟

و عشان اوضح لكم شوفوا الأمثلة هاذي

.عبير ماشية في السوق مع زوجها احمد وبالصدفة

 تلقى صديقة عمرها اماني مع عيالها وطبيعي كاشفة

 وجهها وحاطة مكياج وتلقى عبير تسلم على اماني

 بحرارة و احضان وبوس كأن لهم خمس سنوات ما تقابلوا ،

 ولما تروح اماني تلقى عبير تقول لزوجها احمد

 شوف القردة هاذي كيف حاطة مكياج حتى

 مو قادرة تفتح عيونها زي الخلق من كثر المسكرة

 على عيونها…

ترجع بدور من العرس قريب الفجر وعلى طول

 تتصل بصحبتها ندى اللي كانت معها في نفس

العرس ويبدأ موضوع الحش وطبعا تكون

 البداية بالعروس و أيش و الفستان الغجري اللي

 لابسته والمكياج البايخ وبعد كده ينتقلوا

 لموضوع تسريحة شعرها وبعد ما ينتهوا من حش

العروس ينتقلوا الى بقية المعازيم وحدة وحدة وفلانه

 فستانها لبسته في زواج البيت الفلاني قبل شهرين

وفلانه ما تعرف ترقص اللي يفشلها والثانية ما

 غيرت جوالها لها اكثر من سنة وطبعا يستمر الحش

 اللي بدى بعد العرس الى آذان الظهر

.وفي المقابل شوفوا آدم المسكين ..

 تلقاه وهو خارج من عند الشباب يقول : نشوفكم

 على خير و استروا ما واجهتم.

يابنات حوا ياريت تستحوا……

تحبوا اكتب عن الشخصيات؟؟؟

أحب أسألكم ايش رأيكم لو أكتب عن شخصيات سواء كانوا ناس

 معروفين أو غير معروفين؟ ولا يروح بالكم بعيد يمكن تقولوا

 إني راح أنافق أو إني راح اكتب عن ناس

 تربطني فيهم مصالح..

الا تدري

الا تدري ان الحب هو عبارة عن وهم يؤدي الى العشق؟؟ والا تدري ان العشق احد اهم اسباب امراض القلب والجنون؟؟ 

تدري و تدري وتدري..  و في النهاية تدري أن كل شي في هذه الدنيا مجرد  وهم  يـتحول  الى واقع في زمن أغـبر…..  كل شي فيه  مجرد  حلم.

فشخرة حريم…

اكثر شي يميز البنات و الحريم عندنا في جدة الفشخرة الزايدة ،، وتعريف الفشخرة هي الوصف الكاذب الرفيع

و الراقي لشيء معين و انه يكون مستواه فوق مستوى الناس اللي جالس تتكلم عندهم.

قرب العيد والناس اشترت حلويات العيد من المحلات المعروفة في جدة بس تلقى حريم يحلفون ان حلوياتهم حق

 العيد جابوها من جنيف او باريس ،، وتلقاهم اصلا اشتروها من سوق الخاسكية .

وحدة رايحة زواج ( جواز على قولتنا احنا اهل جدة ) ولابسة فستان تسلفته من وحده  صحبتها و تلقاها في الزواج

 تتكلم عن المصمم اللي صمم و فصل لها الفستان ، و الحقيقة الفستان سلف.

شلة حريم جالسين يتونسوا و ياكلوا فصفص  و كل وحده بتحكي في راحوا في الصيف و ام فلان فاقعه قلبهم ب مصر

 و فين راحت وفين جات و حاسة نفسها كأنها كانت في النمسا و تعايرهم وش ذا اللي اسمه سياحة داخلية.. و مادرت

الأخت ان ابها صارت أغلى من فرنسا.

المرة الجاية راح اكتب لكم عن فشخرة الرجال وكيف صارت أدهى و أمر من فشخرة الحريم

احساس طفلة

طفلة عذبها البكاء..

طفلة عذبها الشعور بالألم…

ودها تحكي و تسولف.. وتضحك..

ودها يوم تكون في حضن امها….

حلمها في يوم تكون مع ابوها…

طفلة..هانت على اهلها.. محد يعيرها اي اهتمام…

محد يقاسمها الفرح..هذا اذا حست بالفرح..

ما تشوف امها الا دقايق في اليوم..و يمكن في الشهر..

تشوف ابوها بالصدف..اذا جاء وهو مستعد للسفر…

طفلة برائتها تخليها تسرح.. و تحلم..انها تكون مع ابوها و امها..

تحلم انها تكون معهم طول اليوم..

تحلم انهم يسألوها عن احوالها..وكيف اصبحت.. و كيف أمست..

طفلة عذبها البكاء..

طفلة عذبها الشعور بالألم..

غصب عليك…الهلال يفوز

و تتكرر المهزلة..الهلا يفوز على الأهلي.. وطبعا الهلال فاز

لانه الفريق الوحيد اللي يلعب ب 12 لاعب داخل الملعب..

و أقوى لاعب فيهم اسمه الحكم..وهذا الحكم يتكون من 3 أشخاص

(حكم الساحه و حكام الراية) يعني بصريح العبارة فريق الهلال يلعب ب 14 لاعب..

الهدف الأول للهلال أحرزه اللاعب الهلالي ماجد المرشدي..

وطبعا اللاعب ماجاب الهدف برجله او راسه..لأ.. جابه بيده

 والحكام شافوه بس خلوها تعدي..لان اللاعب نيته يجيب هدف

للهلال..و الهدف الثاني ضربة جزاء لصالح فريق الهلال مع ان لاعب

فريق الأهلي خالد بدرة ما لمس اللاعب الهلالي النصاب و الممثل القدير

سامي الجابر..( طبعا سامي ممثل قدير و كبير وأكبر غلط انه ماشارك للحين

في المسلسل الشهير طاش ما طاش او الفلم السعودي كيف الحال لانه

ممثل أفضل بكثير من الممثلين المتواجدين في الساحه حاليا)

هذا وغير ان ضربة الجزاء ماكانت صحيحة لان اللاعبين دخلوا

منطقة ال 18 قبل تنفيذ ضربة الجزاء..

و اقترح ان الفرق اللي راح تلعب ضد فريق الهلال بعد كده انهم

ينسحبوا من المباريات او انهم يرسلوا فريق البراعم و الناشئين مع اي

باص موجود في النادي عشان يتجنبوا حالات الضغط و الجلطات

اللي بتصير وقت المباراة..

و السؤال اللي محير كل متابعي المباريات في الدوري السعودي..

ليش الهلال هو الفريق الوحيد اللي ما يتضرر من التحكيم؟؟؟؟؟؟

اكيد انتوا عارفين فين تلاقوا الاجابة بس ياريت يروح واحد ويسألهم..

هذا الوطن

هذا وطنا.. عزوتنا وقدرنا..رخائنا و أمننا..

 أطهر بقعة في هالكون الوسيع..أرض الحرمين

مملكة الإنسانية..منبع الإسلام..المملكة العربية السعودية

مهما عطينا بلدنا..ماراح نوفيها حقها..

فيها ولدنا..ربينا..كبرنا..عشنا لحظات عمرنا

بحلوها و مرها..كل واحد مننا يذكر كيف قضى

طفولته في حب الأهل وحب و أمن الوطن..

اليوم كبرنا..صار هدف كل واحد فينا..

انه يرد شي من اللي عطتنا اياه بلدنا..

شباب بلدنا ..نفتخر فيه مثل ما نفتخر بأبائنا

و أجدادنا..اللي بنوا بلدنا..

دمتي يالسعودية…دمتي عز و فخر لنا.. ولكل العرب و المسلمين

ابنك المخلص/محمد بن سالم

ياهلا و مرحبا فيكم

في البداية احب اشكركم لزيارة مدونتي واتمنى اكون مدون خفيف عليكم