لسه صغير … كبير على هالصف

وللحين ما قدر ابو فيصل حل عشان يسجل فيصل في

المدرسة.. كل ماراح مدرسة يبي يسجل فيصل في اول

ابتدائي يقولون له ولدك لسه صغير.. ما كمل 6 سنوات

 عمره 5 سنوات و نص.. حاول

حاول يلقى واسطة..وما لقى..فكر انه يسجل فيصل في

مدرسة اهلية.. لكن العين بصيرة واليد قصيرة..مالقى

حل الا انه يسجله في السنه الجاية وتروح عليه هالسنة..

قبل الدراسة بأسبوع..في السنه الجديده.. اخذ ابو فيصل

ملف فيصل..وراح يسجله.. و قابل وكيل المدرسة..

و ابتسم الوكيل في وجه ابو فيصل و قال: اسف يا ابو

فيصل.. ولدك عمره 6 سنوات و نص وما نقدر نسجله

لانه اكبر من الطلاب اللي في الفصل ب 6 اشهر,

و احنا حريصين على ان يكون عمر الطلاب في نفس السن.

و رجع ابو فيصل يدور على واسطة لتسجيل ولده مثل

السنه اللي فاتت.. وكملوا انتوا الحكاية…

يارب فهم الأغبية اللي في ادارة التعليم .. وياليت يشوفوا

نظام مطور اكثر من كذا.. بس الظاهر  ان الحل عند

كل زوج وزوجه.. لازم يحسبوها صح..

الـفـريــج

 

 

تحية كلها فخر الى الشباب في دولة الامارات الحبيبة وخصوصا

الى الأخوان محمد سعيد حارب وسلطان سعيد حارب والى جميع

طاقم مسلسل الرسوم المتحركة الفريج.

ماراح اقول مسلسل للأطفال..بالعكس هذا مسلسل للجميع و لكافه

الأعمار..حاله حال اي مسلسل والكثيرين يعتبرونه افضل من كثير

مسلسلات تم عرضها في رمضان الماضي..

فشكرا الف شكر للأخ المبدع محمد سعيد حارب واتمنى ان مسلسل

الفريج يكون سبب لولاده الكثير من ابداعات شباب وبنات الخليج و

وانشالله نشوف الفريج في جزءه الثاني وباللهجات المختلفة زي ما

وعدنا الأخ الغالي المبدع محمد سعيد حارب.

 خلنا نرحل عن ظروف اتعبتنا 

عن الآم عذبتنا..عن ظروف عاندتنا 

خلنا نرحل لدنيا جديدة 

كلها طيبة..كلها احساس..كلها اشواق وامل 

ودي اضحك مثل الطفل 

ودي احلم..ودي افرح 

ودي اشوف القمر وانا خالي البال 

اتغزل في النجوم بكلام كله خيال 

و اقول للقمر تكفى 

خلنا نرحل..عن ظروف اتعبتنا 

وعن الآم عذبتنا..وعن ظروف عاندتنا 

خلنا نرحل 

بسكوت بالتمر

اليوم عشان خاطر البنات اللي طفشوا اهلهم و ازواجهم بأنواع

معينة من الحلى ، وما يعرفوا يسووا شي ثاني ،، اقدم لهم هذي

الوصفة الخطيررررة مررررررررررررة عشان تخلوا الحلى يدفع

البلى زي مايقولواوما يدفعكم الى خارج حياتكم الأسرية ويمكن

حياتكم الدنيوية..

المقادير تكفي اربعة اشخاص وبس..

مدة التحضير : ساعه وحدة بس..

المقادير::

نص كيلوا تمر منزوع النوى ( فتحوا عيونكم وانزعوه

تمام ، مو كم حبة منزوعه النوى والباقي فوقه)

كوبين طحين.. ربع كوب سكر بودرة..

حبتين بيض ( وربي بدون قشر)

ملعقة كبيرة ماء ورد..

طريق التحضير::

اول شي نخلط البيض مع الطحين والزيت والسكر وماء الورد

حتى تصير العجينة متماسكة..

وبعد كده نفرد نص كمية العجين داخل الصينية وبعدين نحط

الحشوة على سطح العجينة بعدين نغطيها بنص العجينة الباقية..

وبعدين ندخل الصينية داخل الفرن لمدة ثلث ساعه على نار

متوسطة.. ولمن تخلص نحط شوية سكر عليها..

وتقدروا تقطعوها على شكل مربع او مثلثات على حسب مزاجكم.

عاد اللي ماراح تعرف تسويها ،،يعني معليش احس انه مالها اي

داعي في العالم مو بس عند اهلها..

بالهنا والعافية

حاول و جرب

بالأمس وانا اتصفح في جريدة عكاظ لقيت في الصفحة الأخيرة زاوية

باسم ( بعض الحقيقة) للكاتب السعودي عيسى الحليان موضوع عن

شاعر المليون، وجلست اقرأه وبصراحه استغربت من الكلام اللي

كاتبه الأخ المحترم والانتقاد الغير محترم والصريح للبرنامج ككل،

ابتداء من المذيعه والجمهور الارسترقراطي على قولته وان هالبرنامج

يعتبر مثل سوبر ستار لكن اللي على المسرح شاعر وليس بمطرب

وان هذا البرنامج برنامج مخجل وهيئة التحكيم مبجلة والمسرح كله

اضواء بانورامية وان الشعراء المتواجدين عبارة عن متسولين على

الهواء..

اول شي احب اقول للسيد عيسى الحليان ،اذا جيت تنتقد شي اتمنى انك

تنتقد بشكل محترم وراقي شوي،الشيء الوحيد اللي اتفق معاك فيه هو

المذيعه والماكياج الزائد عن الحد، المسرح من اروع المسارح اللي تعرض

فيه مثل هالبرامج ، وغريب منك انك تقول على هيئه التحكيم مبجلة.

هل انت نقهور مثلا لانه لم يتم توجيه دعوة لك لحضور البرنامج مثلا؟؟

الى هنا وسمحنا لك..اما انك تسمي مدح الشيخ محمد بن زايد تسول على

الهواء ، عيب يا اخوي..

 يا اخي من حق الشعراء انهم يمدحوا الشخص اللي ساعدهم للظهور

امام الجماهير .. من حقهم يمدحوا الشخص اللي رحب فيهم في ديرته و

اكرمهم طوال مده اقامتهم فيها..هل نسيت ان معظم المشاركين في

من بلدنا الغالية السعودية.. معنى كلامك اننا شعب متسول وشحاتين،،

صح ولا لا؟؟

ياليت بما انك صحفي و اعلامي تروح و تحاول تعمل لو ربع البرنامج

اللي جالس تنتقده ومو عاجبك..او جهز التصاريح الممكنة وانا شخصيا

راح اكون اول الراعين الرسمين للبرنامج.

ولا اللي ما يطول العنب يقول عليه حامض

دايت ولا عادي

فيه ناس تحب تعمل ريجيم قاسي..وفيه ناس تحب

ريجيم عادي..واكثر الناس يسعملوا شي اسمه الريجيم

النفسي.

اكيد ببتساألوا ايش هو الريجيم النفسي؟؟

الله يسلمكم الريجيم النفسي هو ان الشخص مثلا يروح

هارديز او ماكدونالد ويطلب اكبر وجبه عندهم واذا جا

يختار الشراب يختار داييييت بيبسي..

مرة من المرات ماقدرت امسك نفسي وانا واقف اطلب

من سياتل بست،،جت وحده بنت الله لا يبلانا من

ضخامتها و سمنها..وصاحبي اللي معاي قال لي لاتطلب

ليدز فيرست..المهم خليناها تطلب قبلنا وشوفوا ايش طلبها.

روزبري موكا..(اكثر قهوة تحتوي على سعرات حرارية

وسكريات وبلاوي ثانية..)

لارج سايز.. موور كريممم

ووصل المشروب الضخم حق الأخت و غلطتي اني قلت لصاحبي

شوف الريجيم اللي على اصوله و انفجرت من الضحك وفي

المقابل الأخت عصبت بزيادة وقامت و رمت الكوفي علي بس

الظاهر ان التصويب عندها لك عليه وجا الكوفي في صاحبي

وهذا الشي اللي خلاني اضحك بزيادة..

يعني من جد الريجيم النفسي هذا ريجيم الواحد ما يسويه

اللي و يبغى يضحك على نفسه.. و اكيد انتوا بتشوفوا كثير

مثل هذي الحالات..

للعائلات فقط

للعائلات فقط.. اصبحت هذي الكلمة رعب في عالم العزاب..

وخصوصا اذا يبغى يطلع في نهاية الأسبوع.. وافضل مكان

صار مسموح للعزاب براحتهم هي مقاهي الشيشة والمعسل..

تخيلوا انه في بعض المطاعم اذا صار زحمة في قسم العائلات

يقفلوا قسم الشباب ويخلون المطعم كله للعائلات..

وبالنسبة للشباب مو مهم لانهم عيال… ومو مهم اذا اكلوا او لا..

اتوقع بعد كم سنة راح يحاصروا العزاب في مكان بعيد عن

اي مدينة ويكون عليهم حرس عشان لا يخرجوا من هالمكان

و عشان لا يزعجوا العوائل..

و احلى شي لما تشوف اخصائي اجتماعي او نفسي في احد

القنوات الفضائية و يتكلم عن تصرفات الشباب وان اغلبيتهم

صاروا بيتصرفوا بشكل عدائي وان شريحة كبيرة منهم

بدأت للأسف بتعاطي المخدرات وتم دخولهم في عالم الجريمة

و الأخ اللطيف ناسي انه هو و اشكاله من الأخصائيين احد

اهم اسباب انحراف الشباب لانهم بصراحه من اصحاب فكرة

للعائلات فقط.. ولا ننسى الأخ مدير احد الملاعب الرياضية

صاحب الاقتراح الغبي .. واقتراحه هو جلد المشجعين

المشاغبين بدل توعيتهم…

دلع بنات

دلع البنات ماله اول ولا له اخر.. كل بنت ولها طريقتها في

الدلع..كل بنت تحب انها تتدلع على كيفها،، و بمزاجها..

وفيه دلع يكون لمجرد الدلع.. وفيه دلع يكون لأهداف و

استراتيجيات معينة..( ان كيدهن عظيم)..

فيه بنت تدلع على ابوها..عشان تحس بأنها المقربة

و عشان تحس انها المفضلة بين اخواتها و اخوانها..

و فيه بنت تدلع على حبيبها عشان ما يقول لها لأ  لأي

طلب تبغاه..

و فيه بنت تدلع على زوجها..لكنه يعطيها بال ……. على راسها

لانه طفش من كثر الدلع و الطلبات ومو رايق و مزاجه عكر

بسبب خصامه مع مديره في العمل…

وفيه بنت حياتها دلع في دلع..ما تطلب شي الا و جاها طلبها

وفوقه زيادة..

ويتضح لنا في النهاية ان الضحية غالبا هو الرجل لانه الشخص

الوحيد اللي بينفذ طلبات البنات .. و عمره الرجل ما يلقى شخص

يدلع عليه..

مسكين الرجل دايما غلبان.. و ضحية لكل افعال النساء..

عيشوا معنا

يعرض في قناة LBC حاليا و بشكل يومي برنامج رائع اسمه

عيشوا معنا…من تقديم الأستاذ علي العلياني.. و الأخوات غادة مصلي

  و منى سراج..

اول شي احب اشكر قناة LBC على تقديم برنامج محترم و راقي

يناقش كثير من القضايا في مجتمعنا السعودي بشكل جاد و هادف

و ثاني شي ودي افهم ليش هالبرنامج مايعرض في القناة الأولى؟؟؟؟

برنامج بسيط و جميل و يجبرك على متابعته واحترام كل من فيه

سواء المذيعين او الضيوف و الأساتذة المشاركين في البرنامج

واتمنى من كل قلبي ان الادارة في القناة الأولى يرحمونا من البرنامج

اللي يجي في الفترة الصباحية..كل مواضيعهم مكررة من اكثر من 20

سنة وكلها عن المرأة وادارة وقتها وعن الأمراض و الأدوية و اخيرا

عن المطبخ..

والله ياناس محتاجين شخص متعلم ومخه نظيف عشان يعيد

هيكلة البرامج في القناة الأولى و الثانية عشان تظهر بشكل مشرف

لبلدنا الغالية..

هاردلك جراح الدوسري وبالتوفيق هشام الهويش

 اليوم شفت فيلمين ..الأول فيلم كيف الحال.. وكلنا طبعا شفنا

   الدعايات المصاحبة للفيلم والمعروف ان بطل الفيلم هو الشاب السعودي

  هشام عبدالرحمن الهويش..  بصراحة الفلم بيتكلم عن واقع

 اغلب العائلات عندنا و المشاكل اللي بتحصل بين ابنائها ..الفيلم

 يعتبر افضل بكثييييييير من الأفلام العربية اللي بنشوفها الأيام هذي

وانا استغربت الهجوم اللي واجهه فيلم كيف الحال.. هل لأنه فيلم سعودي

او لأننا تعودنا اننا ننتقد اي شي يكون صادر من شباب بلدنا سواء كان شيء جيد

او رديء..

الفلم الثاني كان بعنوان استنشاق الهاوية.. المشكلة في الفيلم انه متواضع من

جميع النواحي..القصة غير هادفة…التصوير سيء للغاية لدرجة

 انك تحس ان الفيلم مصور بكاميرا جوال..القصة غير هادفة

 و خيالية زيادة عن اللزوم.. صحيح ان فيلم كيف الحال قدم له الكثير

 من الدعم وخصوصا انه من انتاج روتانا.. لكن من غير المنطق

 ان يقول مخرج فيلم استنشاق الهاوية السيد جراح الدوسري

ان فيلمه افضل من فيلم كيف الحال من ناحية القصة و الهدف.. و كل شي..

واذا استمر مخرج فيلم استشاق الهاوية في اخراج المزيد من الأفلام السعودية

فسيكون فعلا الهاوية اللتي ستسقط منها الأفلام السعودية في المستقبل..

مبروك هشام الهويش

هاردلك جراح الدوسري