فخر الأجيال ( القصيدة الخامسة )

سمو الشيخ حمدان بن محمد بن راشد آل مكتوم …هذا الشبل من ذاك الأسد ..

يمشى على خطى والده الشيخ محمد بن راشد آل مكتوم ..تجرع منه حب الوطن..

حب دبي.. حب الخير ..الشعر يمشي في عروقه مجرى الدم..وعلى نهج والده في دعم الشباب ..

و حفظ التراث..حمدان بن محمد.. فزاع..هذي قصيدة من اروع القصايد اللي كتبها فزاع في مدح

والده ، واعتقد انه مافي شاعر مدح والده في مثل هذا المستوى

الذي بينت مقدار الحب لأبيه و الاعتزاز بالأب كقدوة ليس لها مثيل.

على وصف الرجال اللي تسمى بالأفعال رجال

                                       لفت بيض العلوم وبيض الله وجه راعيها

لفت ما كنها الا سبق الخيل ان بدت تختال

                                         نواصيها النعوت وفي مناكبها ..قوافيها

قصايد والقصايد ما نساومها بجاه و مال

                                           نعب بحورها وان هاج مزملها نرسيها

اذا امتد الفكر و امتد ليلي والقصايد و طال

                                       توشحت الشوارد و لبست الأشعار غاليها

كذب من قال ساعفني عليها الجن يوم تقال

                                         انا البس جنها اصدر مواردها و ارويها

انا ولا فخر نجل الشامخ المتمرس الريبال

                                      على وصفه تجاريني القصايد قبل اجاريها

على محمد بن راشد ال مكتوم طاب الفال

                                        وطابت لي قبل لا الزم قوافيها…معانيها

متى قالوا صواريها المعاني ما هناك اشكال

                                          حرام اني لمد شراعها لأكبر صواريها

على اكبر منبر ارميها ثنى وفخر وعز و اجلال

                                    مادام ان الثنى لأهله على اكبر منبر ارميها

لأجل قرم غرس حلمه لشعبه و اثمرت آمال

                                             حقايق نبصر اولها ونتباشر بتاليها

حقايق واضحه من دون ابو راشد صعب تنطال

                                          تباركها القلوب و تبهر الناظر مغانيها

معانيها تراود كل عطر ما خطر عالبال

                                      و اراضيها يراود كل عاشق فوق ناديها

اراضيها الخزامى و النفل والبختري و الهال

                                  وما يخطر على البال العطر يزخر بأراضيها

ولي فيها محب اسرف على قلبي و حط و شال

                                   طلب روحي وروحي منه فيها اللي يكفيها

من اول ما عرفته والضلوع تجر له موال

                                         ولا ادري نيته بضلوعه وش تواليها

انا محتار مابينه وبين دبي بالمثقال

                                        يا اما دبي له تحلى او انه هو يحليها

او ان دبي تحلا لان ابو راشد لها خيال

                                   نعم والله و تسبق خيلها من سبق واليها

دبي العز من طيب النسايم عودها ميال

                                تمسي صاحب القدر و نحن باسمه نمسيها

صدى داره بشرق وغرب وجنوب التقى و شمال

                                 قبض الاربع جهات يلين داره ذاع طاريها

طغى عزمه على وعر الدروب وله غدت مسيال

                               تسيل الأرض لاقدامه و تفتخر من مواطيها

غريبه كيف جادت به سنينه والسنين بخال

                              و الاغرب كيف تظما له وهو بالجود يسقيها

لو ان المجد سهل ان كان طال منه ونال

                                دروب المجد و دروب العلا صعبه مراقيها

طويل العمر ما جيت اعتزي في وصفك الامثال

                                            ولكن المثايل تعتزي بك و البيها

يا ابوي ابشر ترى شبلك توارث عن مداه اشبال

                              وثب فوق الدروب و سابقت رجله خطاويها

ورث عزمك و حزمك والخصال تجر طيب خصال

                                    مواثيقه على طرق المكارم بك يجديها

اذا شد الفخر لاجلك رحالة قمت اشد رحال

                            على نهجك عشان افرد رحاله وارجع اطويها

واذا قالوا من ادرى بالحصى والوزون ثقال

                              عرفت ان الوزون ثقال وانت ادر بحصابيها

على الدنيا جدال الا انت ماعليك جدال

                                 مع ان يديك يجادل كل وادي سيل واديها

لو ان السحب تنشأ من كفوف امست عليك ظلال

                            و خرت ساجده لأهل الثرى من جود منشيها

مكارمك المكارم والعطايا من بحرك جزال

                             لو ان السفن تجري في يمينك ضاع شاطيها

يمينك لاحت وابرقت و ابطت وهي تنهال

                                   ولا والله تدري عن يسارك كم معاطيها

وكم رجل بصدره حاجه و جاك وقبل لا يسال

                              عطيته ..كانك ادرى بالصدور وسر خافيها

وكم حلم سبقته كان في عين الزمان يحال

                                  تقول المقبلات افضل عليك اسرا باريها

يقولون اختصرت اجيال واقوا انته فخر الأجيال

                             اذا الأجيال ما تفتخر بك..من هو يفتخر فيها