قصيده

شعار دنياي الصبر و شعارها الدنيا كفاح

لا قلت يوم و تستوي ..مرت سنين وما استون

والله اني مقتنع باللي يصيب من الرماح

اصغر رماحك صابني يوم اكبر رماحك طعن

وفوق هذا ما سلمت.. انا اسمح ولا القى سماح

كل يمن بجيته ..حتى الدمع لا جاء يمن

ــ

ابوس راسك يا زمن..ماعاد فيني للجراح

خلاص يكفيني أسى .. ابوس راسك يا زمن

يا مكثر ذنوبك معي .. ما كل ذنب لك يباح

لامن زعلت وش تستفيد.. وش مكسبك من ذا الحزن

ــ

استسلمي يا عزتي لا صارت ايامي سلاح

كان نفسي اسعدك بس الليالي طولن

حاولت انا اشعل شمعتي بس المصيبه في الرياح

لاهي باللي نورن.. ولاهي باللي انطفن

ــ

اخترت في الدنيا ثلاث..الستر وانصاف وصلاح

و كرهت في الدنيا ثلاث .. لا و لايمكن و لن

وحبيت في الدنيا ثلاث الفن وامي و الصباح

و حلفت لا ما اخون الثلاث انتي و جاري و الوطن

ــ

من كلمات الشاعر القدير مساعد الشمراني

و لحنها و غناها الفنان الكبير علي بن محمد