اشياء في خاطري اقولها ….٦

الى متى و نشوف البنت تدخن او تشرب شيشه مع امها؟

طيب خليها من ورى امك و استحي على دمك شويه

ليش كل ما تكلم الشباب عشان اي طلعه بعيده او عشان نطلع

عشان نسهر يكون اول شي يسآلوا عنه.. فيه بنات؟؟

مظاهر الناس اكلت الاخضر واليابس والمنافسه الكذابه احتدت

بين الجميع لدرجه اذا احد قال خسرت في الاسهم ردوا عليه

و احنا خسرنا اكثر منك. ماشالله على الغباء حتى في

الخساره متنافسين

ياناس يا بشر.. يرحم ابوكم وامكم كمان.. ترى مافيها شي

اذا الواحد يتزوج على زوجته و حدة ثانيه.. يعني اذا لعب

غلط سبوه و كرهوه واذا اتزوج على سنه الله و رسوله سبوه

ولعنوه وماخلوا فيه شي بالاضاف الى ان كل الحريم اللي في

العائله او القريبين يحذرون ازواجهم من المشي مع

هذ الرجل المسكين.

لقافه الناس ماتنتهي ولا راح تنتهي الا في يوم القيامه..

طيب حاولوا تخففوا من لقافتكم شوي

الا متى و البنات يعايروا بعضهم ..هذي خشمها كبير

وهذي ماتعرف تلبس وهذي كلامها كثير.. يابنات

خلو كل وحده في حالها

و يقولوا الممنتخب انهزم ليش؟

ومازال محمد نور خارج تشكيلة منتخبنا الوطني

و المدرب ناصر الجوهر يقول راح استدعي نور

اذا احتاجه المنتخب ، وكثير من لاعبين المنتخب

مصابين .. يعني بالله متى راح يحتاجه اذا ما

احتاجه الان؟؟

و المسآله مو مسآله عناد لان هذا منتخبنا كلنا

ولازم نخلي مشاكلنا كلها اللي بين الانديه على

جمب و نشوف مصلحة المنتخب.

حياكم عالعشا

حياكم الله عاالعشا..

هالكلمة دائما نسمعها في كل عزيمة سواء بمناسبه او بدون مناسبة ، ٩٩،٩ في الميه

و غالبا و دائما وفي كل مرة و اكيد وبلا آي مجال للشك راح يكون الغدا او العشا و

يمكن الفطور كماااااان ذبيحة، صحيح انها من الكرم و الشهامة و العروبة،ما اختلفنا

طيب ليش لازم ذبيحة سواء خروف او غنم او حاشي؟

طيب خلوها سمك .. خلوها بوفيه سلطات و مقبلات و خلوا الناس تخفف من وزنها

شوية. طيب و عشان اللي مو عاجبه نروح نجيب مثلا شواية كبيرة و نجيب الشيف

من اي مطعم عشان يشوي شويه مشويات وبالمرة قدها تغيير.

ولا لازم ذبيحة؟؟؟؟

قصيدة ….لعيونك

لعيونك اللي علمت قلبي الطيش

و البسمة اللي نورت لي مكاني

ورموشك اللي كنها للعدو جيش

اني لآخلي الليل له شكل ثاني

دامك وصلتي و الحكي صار بشويش

وشلون انا ما اقول شعر و اغاني

طفل المشاعر بيننا عله يعيش

يلقى له ام تحرسه و اب حاني

وش لي دخل بالنوم و وسادة الريش

مادام حضنك ضمني و احتواني

طيفك يشاركني على لقمة العيش

ان مالقيته في المحاني لقاني

و العاذل اللي قال لي قلت له ايش؟

رح رح ترى مالك لوى يا آناني

تبغاني انساها وانا احبها ليش؟

من جدك انساها و آضيع زماني

.

.

كلمات الشاعر المبدع..فيصل اليامي

اليوم الرياضي الاول في مدينة الخبر

يوم رياضي مليء بالمفاجآت و التحدي

للحجز و التسجيل

gm@1happynation.com

سوف يعلن عن اماكن بيع التذاكر يوم السبت القادم

صباح الخير

كل يوم الصبح و في طريقي للعمل اتمنى  اني القى كل الناس مبتسمة

و تسلم على بعض وترد التحيه ، و لكن للآسف اغلب الناس مكشرة و

اخلاقها  في  خشمها و مو طايقه احد. والشوارع ازعاج ناس تنزل من

سياراتها  و  تتخاصم  و حادث هنا و هناك. الى متى راح نستمر على

هالحال يا ناس؟؟  نفسي في  يوم وانا نازل ورايح للعمل القى شخص

قدامي  يبتسم و  يسلم  او يرد السلام .   مو الاقى شخص يبعد عني

مترين و هو  يركب السياره يرفع يده ويآشر و بدون اي كلمة  معناها

انه يسلم….  مالت عليه و  على سلامه.. اعتقد  ان الواحد لازم  يسكن

في كامباوند  عشان يشوف الناس كيف تبتسم في وجهه و  على الاقل

يسمع كلمة  جودمورنينج  بنفس  طيبة ومن ناس قلوبها نظيفة تحترم

الغير و ترحم الصغير و تقدر الكبير.

و جود مورنينج شباب و صبايا