العالم في السوق

في الفتره هادي يكثروا البنات في الاسواق سواء اللي يبغوا

يشتروا او اللي يبغوا يتمشوا او عشان يغيروا جو .. وطبعا

الواحد بيشوف برضوا شباب ولكن راح اتكلم عنهم شويه

بعد البنات. واحس ان البنات عايشين في عالم مافيه احد

غيرهم  وصرنا   نشوف  اشكال   عليها  العجب و انواع

البراقع  و العيون اللي مكحله و الشباب مساكين وراهم و

اعتقد ان هالبنت اللي متبرقعه لو كشفت ما راح تلاقي لو

حمار  يطل فيها  وهذا الشيء مؤكد على نظريه ياما تحت

السواهي دواهي … و فيه بنات مقاريد حتى لو اتبرقعت و

لو سوت اللي تسويه بس اهم شي انها مقتنعه انها وحشه

و مقتنعه  بالمثل الحجازي القديم اللي يقول

قالوا للقرده اتبرقعي .. قالت وجهي متعود عا الفضيحه

و كمان الواحد بيشوف ماشالله تبارك الله بنات متحجبين

و متسترين و لكن ماشالله يكون  مبين الجمال الرباني و

الجمال الاخلاقي في البنت. وعن نفسي استغرب من بعض

البنات  اللي يتكلموا  مع  بعض بصوت عالي و السوق كله

بيسمعهم و الضحك  على الاخر  كي كي كي . و ها ها ها

و برضوا بتشوف بنات جالسين في مقهى و اخذين الطاوله

اللي في  الزاويه و  جالسين  بيدخنوا ولا معطين اي اهتمام

لاي احد. واكثر شي يزعلني يا ناس لمن يكون اب غلبان في

السوق ومعاه بنته و تمرمط فيه من محل الى محل و انواع

الزعل  لو ما  اشترى لها  اللي تبغاه… وعاد العبايات ماراح

اتكلم عنها لانها موضوع كبيييير و يبغاله بحث و تحري في

عالم العبايات.

نجي للشباب

شله من ٣  بزوره  عفوا قصدي شباب ما قبل العشرين ..

الشعر كدش يعني مكنوش و يمكن يكون ما غسل شعره

من ٣ او ٤ شهور و الحلق في اذنه و البنطلون طايح و

جالسين يتفرجوا على الرايحه و الجايه و لكنهم مؤدبين

بس بيتفرجوا. و مجموعه ثانيه مكونه من شبشبين عفوا

قصدي شابين بيلحقوا بنتين و يبغى يعطيها رقمه بالقوه.

وبرضوا  واحد  هناك  كاشخ  لوحده  وكل ما مرت بنت

يتميلح عليها و يرمي كلمه غزل يمكن قلبها يحن عليه و

ترد عليه بكلمه.. و واحد  ثاني  جريء لدرجه انه بيروح

للبنت و امها معاها و يجي جمب البنت وما يعطيها رقمه

في ورقه. لا لا لا…. هذا  يوقف مع  البنت  وهي  بتطلع

جوالها  من الشنطه و تخزن رقمه بشكل عادي وهذا اذا

ما عزمها على فنجان قهوه في نفس المركز.

وفيه شباب ما يحب يدخل المراكز .. نلاقيهم بره المركز

منتظرين بره في سياراتهم لانهم بيخافوا على البنات و

يحبوا  يوصلوهم  في  موكب  اكبر  من موكب الرئيس

الامريكي نفسه الى بيتهم خوفا على اعراض الناس..

و للحديث بقيه..

ما عرفنا لكم

في كل مره نقرر يجتمعوا الشباب المدونين في الشرقيه يصير خلاف

حاد على المكان اللي راح نجتمع فيه. مع اننا نجتمع عشان ننبسط

و نضحك و نغير جو مع بعض.

شباب يبغو الاجتماع في الدمام .. و شباب يبغوه في الخبر. و يجي

البعض و يقول ما نبغى نجتمع في اسواق تجاريه. بس اهم شي اننا

كلنا اتفقنا اننا ملينا من اوتاكوشي اللي في حي الهدا و بصراح كلنا

صرنا نسبب ازعاج لشباب الجامعه اللي يذاكروا هناك .

راح اذكر الاماكن اللي اجتمعنا فيها من قبل و عيوبها بالنسبه لي و

اتمنى ان الشباب انهم يذكورا اي مكان و العيوب اللي فيه و ياليت

كل واحد يقترح مكان عشان نجتمع فيه وراح ناخذ رآي الاغلبيه منهم

مع اني اشك في اننا راح نتفق.

١- اوتاكوشي : مكان حلو و جميل بس المشكله في صغر مساحته و

ان بعض طلاب جامعه البترول يذاكروا فيه . صاحب اقتراح هذا

المكان هو المدون حسام.

٢- فندق عرش بلقيس : من اقبح الاماكن اللي زرتها في حياتي بسبب

الاجواء السيئه و الجو المكتوم في الكوفي شوب. صاحب اختيار هذا

المكان هو المدون الكبير و عمدتنا و كبير الجلسه حلا بزياده .

٣- دينكن دونات : مكان حلو و لكن الزحمه اللي فيه تحسسك بانك جالس

في شارع زينه السيارات اللي في الثقبه او اللي في كيلو ٢ في جده.

و الاختيار كان شبه موفق عن طريق الاخ الطيب ماشي صح

٤- فيرتشو كافيه ١٨٨٢ : مكان كان حلو في اول ايام افتتاحه و بعدين

صار ممل و بشع و انا اللي اخترت هالمكان.

اتمنى من كل شخص يقترح فين يبغانا نجلس و انا عارف اننا ما راح

نتفق و للعلم في حاله عدم اتفاقنا راح نخلي في كل مره واحد مننا

يختار المكان و بشرط ان الكل يوافق بدون اي اعتراض بس الله يخليك

يا ابو سعد لا تختار الكوفي شوب اللي على طريق المطار لانه بعيد

علينا كثييييييييييييييير

و المتزوجين يقولوا ما نبغى نخرج في الويك اند عشان احنا نخرج مع

اهلنا و لمن نجتمع في وسط الاسبوع ما يجوا و الشباب الي ما يرد

على الجوال واللي نايم.

شكلها راح تصير كل واحد يخرج مع ٢ او ٣ و تصير الدعوه كل

واحد و شلته

نصاب و حرامي

يعني بالعربي يبغى وحده سعوديه او عربيه غنيه و يتزوجها

و يسرقها و يمشي.. قال ايه تدعوني للاقامه معها

لقافه ناس

اكثر شي يقهر هي لقافه الناس

مثلا تكون جالس في كوفي شوب مع الشباب ويجي واحد منهم

بدون اي استئذان ياخذ جوالك وقدامك عيني عينك يقوم بالدخول

على الملفات و يشوف اللي فيه، واذا قلت له رجع الجوال لمكانه

يسوي انه زعلان،، خليه يشرب من البحر

او فيه اشخاص لمن يتصلوا على الواحد وبعد السؤال عن احواله

يبدآ التحقيق ،،فينك و فين رايح و فين جاي،،بس كله كووووووووم

و لمن يسآلك.. مين اللي معاك؟

عدنا جار في الحي دب و دايم مربوش و طبعا من تصرفاته انا

لقبته باسم انثى الا وهو .. السيده زكيه.. لا تسآلوني ليش بس

الاسم راكب عليه.. طبعا هذا يحب ينقل اخبار الناس لبعض ب

طريقه مخيفه و زاده عن حدها،، الحمدلله يا رب راح ننقل من

هذا الحي السقيم

هذولي موقفين تعرضت لهم اليوم في اقل من ساعه وفيه غيرهم

كثير من اللي اعاني من لقافتهم.. و اكيد في حياتك ناس مثلهم

كثييييير

والله عيب ٢

والله عيب لمن تظهر للعالم بوجه الانسان المتحضر المثقف

و لمن يجي واحد عادي يخطب اختك على طول ترجع تقلب

على صفحه العنصريه في حياتك و تقول احنا رافضين و

السبب عدم كفائه النسب.

——–

والله عيب تلقى الرجال يمشي مع زوجته في السوق و اذا

وحده طلت فيه بعيونها الحلوه يظل يتبعها بعيونه الين

تختفي البنت عن الانظار

——–

والله عيب لمن تلقى انسان يصلي و يصوم و مسوي

انه يخاف الله و في نفس الوقت تلاقيه ياكل اموال

الناس بالباطل بحجه من استطاع الحيله فليحتال

——–

والله عيب لمن تقول الستالايت حرام و بعد ما اولادك

يناموا تروح تشغل تلفزيون غرفتك و الرسيفر و تتابع

المسلسلات عشان تواكب الناس في حديثهم

——-

من مقال والله عيب رقم واحد بناء على طلب الاخ الغالي

ثامر الطويرقي.

صحيح اننا كلنا مسلمين ولا فرق بين عربي او اعجمي

الا بالتقوى ، لكن اننا نخلي هندي او بنجلاديشي يآذن

في المساجد بحجه ان اولادنا مو فاضيين كبيره شوي

لانهم مساكين لغتهم العربيه ضعيفه كثييييييييييييير

و تخيلوا المؤذن اللي جمب بيتي بدال ما يقول : اشهد

ان ….. ، يقول اشحد ان ،،،،

الندم

اليوم راح اتكلم عن عاده الندم.. صحيح البني ادم يندم على شي غلط

سواه..لكن في ناس تندم على كل شي و تصير حياته كلها ندم في ندم.

اذكر واحد تعرفت عليه في كورس و كان مبين من اول يوم انه انسان

وراه شي، تخيلوا طول وقت الراحه في المحاضره يتشكى و يقول انه

ندمان لانه ما سجل في الكورس الفلاني و ندمان انه كلم فلان في

موضوع وهذاك احتقره ،، المهم من خلال جلوسي معاه في وقت

الراحه حسيت انه ودي اروح لاكبر بنايه في الدنيا و ارمي نفسي

منها.. وبعد كم شهر لقيته بالصدفه في احد المقاهي و وهو على

نفس حالته.. انا اللي اعرفه ان الانسان اذا سوى شي غلط

يجلس و يعرف سبب غلطته او فشله و يراجع حساباته و يبدا

من جديد ، لكن هالشخص مستحيييييييييييييييييييييييييييل

ولا اتوقع ان عاده الندم راح يتركها الا اذا صارت معجزه.

يا ناس ادعوا لهالشخص لاني بصراحه صرت احس ان

هالرجل اصبح مريض بداء الندم.

امريكانا

كثير مننا يعرف المستوى الرديء و السيء للخدمه و النظافه

في جميع مطاعم هارديز او كنتاكي التابعه لشركه امريكانا.

قرات في مدونه الاخ ابراهيم عن المستوى السيء و الردىء

لطعم الوجبه في كنتاكي وعن تعامل الموظف المصري معاه.

يوم الثلاثاء الماضي بالدمام قابلت الصديق الغالي محمد

ملياني و قررنا للاسف اننا نتعشى في الفرع الجديد اللي

تم افتتاحه في حي المريكبات في الدمام.

المهم دخلنا المطعم و طلبنا الوجبات و انتظرنا مده عشره

دقائق . وفي هذه الاثناء طلبت من العامل انه يخفض صوت

التلفزيون لانه كان عالي بشكل مزعج و مسئول المطعم

في قمه سعادته بفوز احد الفرق المصريه ،،،، فخاف العامل

فكلمت المسئول اللي في المطعم و قام مشكور بخفض

الصوت،،، وبعدها وصل طلبنا وكانت الوجبات مو زي ما

طلبناها فنادى ملياني العامل و شرح له وراح غير الطلبات

وشويه جا الموظف المسئول و على الصوت اعلى من اول.

و طبعا كنت انا ناوي اقوم و اتفاهم معاه بس ملياني قال

لي روق وناديته وقلت له ياخي استحي و خفض الصوت.

و طبعا غصبا عنه خفض الصوت .

يعني مستوى خدمه سيء و كمان ازعاج و الاخ المصري

على باله كانه في مصر و معلي الصوت على كيفه.. يعني

بالله مافي عندهم اداره تتابع المهزله اللي عندهم.

اما نظافه كنتاكي اذكر انا و الشباب كنا نقول اللي يحب

ياخذ عذر طبي عشان لا يداوم افضل ح ل انه يروح

يتعشى في كنتاكي و يشوف بعينه كيف راح يتهنى

في اليوم اللي راح يغيب فيه.

الاشاره حمرا

ماشالله تبارك الله على الزحمه اللي جالسه تزيد في المنطقه الشرقيه

و طبعا صرت لمن توقف في اشاره راح يطول الوقت معاك شويه

وراح تشوف سيارات يمينك و شمالك و كمان راح تشوف تصرفات

الناس اللي راكبين السيارات اللي جمبك.

مظهر صار شبه مآلوف لمن تشوف واحد ومعاه زوجته و اولاده

في السياره و تحس انه جالس يصرخ عليهم و حركات يده كلها

تدل على العصبيه اللي هو فيها.. وكمان بتشوف سياره فيها

شويه بنات حلوين و الشباب اللي في السياره اللي جمبهم

فاتحين الشباك و مشغلين البلوتوث و انواع الترقيم التقني

و الغلبان منهم تلاقيه كاتب رقمه في لوحه ورق و تلاقي اسمه

ابو هاجوس..هههههههه

و احلي شي يموت من الضحك لمن تشوف واحد اسمر .. او

باللهجه المحليه نقول ،، خال ،، و الخال يعني عبد اسود

و كلنا عبيد ربنا،، تلاقيه مشغل المسجل و معلي الصوووووت

على الاخر و جالس يرقص و يهز جوه السياره.

و من الممكن كمان انك تشوف واحد سرحان بخياله و يده

في مكان ما في وجهه يدور على شي ضايع من مخه وشي

طبيعي انك بعض الاحيان و في عز الحر تلقى ٢ شباب

نزلوا من سيارتهم و يتضاربوا مع بعض لمجدر العناد

و قليل جدا يكون فيه انسان يستغفر الله من اللي جالس

يشوفه.

و تشوف ناس و ناس و ناس من كل طبقه وكل شكل

وكل لون..و الدنيا تدور فينا و انصح كل واحد يتامل

الناس اللي حواليه لمن تكون الاشاره حمرا.. و يقول

الحمد لله على احنا فيه

خدمات ما بعد البيع

طبعا العنوان اللي فوق دائما نشوفه في ركن بعيد او مظلم

او بالاصح ما تقدر تشوفه في داخل اي شركه او مؤسسه

عندنا في الدول العربيه.

وكلنا عارفين ان خدمات ما بعد البيع جدا سيئه ماراح اظلم

جميع الشركات و اقول كلهم.. يعني يمكن بس بنسبه ٩٩ في

الميه منهم بس.

و مافي احد مننا الا ومر بتجربه سيئه اقل ما يمكن اننا نقول

عنها انها ممكن تخلي الواحد شعر راسه يشيب واللي اصلع

ممكن ينجلط من الخدمه المقدمه له..

و طبعا كل الوكالات عندنا يهتموا اهتمام كبيييييييير و همهم

الوحيد هو البيع ثم البيع ثم البيع و فقط البيع وزياده مبيعاتهم.

يعني سواء اشتريت شي غالي او رخيص كله نفس الشيء من

الخدمه .. واذا دخلت اي معرض او اي محل تبغى تشتري

غرض معين راح تلقى البائع شويه و يحسسك ان منتجهم هو

الشي الوحيد اللي في الدنيا من نوعه وانهم يهتموا بعملائهم

بشكل غير طبيعي و و و ،

وطبعا اول ما تشتري اللي تبغاه راح تشوف شي عمرك ما

شفته لو خرب عليك .. يعني مثلا مده التصليح راح تاخذ

وقت غير طبيعي يعني مثلا لو انك متزوج و زوجتك حامل

في بدايه حملها .. من الممكن جدا انها تولد و يجيك الطفل

و جهازك لسه ما تصلح.. واذا رحت تشتكي طبعا احلى

عذر راح تسمع كلمه (سوء استخدام ) ،و احسن شي عشان

تاخذ حقك انك تراسل الشركه المصنعه بالخارج عشان يا خذوا

لك حقك من التاجر الجشع و اداره شركته اللي كلهم

يا .. سديق كتعه لسه مافي يزي

او .. بص حضرتك ،، او ياخيو ،،

واذا كان المسؤول واحد من اولادنا راح يقول لك

روووووووووح و اعلى ما في خيلك اركبه

الاتحاد X الهلال

راح تكون اليوم ان شاء الله مباراه فريقنا الكبير فريق الاتحاد ضد فريق الهلال

و اتمنى ان الاتحاد يفوز و يعلم الهلال درس ما ينساه طول العمر

و لكن الخوف من عده عوامل اهمها التحكيم اللي دايما يحب

يعطي وقت اضافي بزياده عن المفروض و ما يصفر الا لما

الهلال يجيب هدف شرعي او غير….

ايقاف جريده الرياضي

تم وقف اصدار جريده الرياضي بدون اي انذار او تحذير

و كلنا عارفين ان جريده الرياضي يمتلكها عميد النمور

الشيخ منصور بن حمدان البلوي

وهذا طبعا احد اهم اسباب و قف و منع اصدارها

و السبب الثاني انه كان في مقال يحكي قصه

طفل مدلل بين اخوانه و طلباته دائما تنفذ

و كلنا عارفين ان هذا المدلل هو النادي الازرق

و المقال بصراحه جدا قوي وفي الصميم و في الاسفل

نقلت لكم المقال و في انتظار تعليقاتكم

الرياضي - جده

ماعندك احد..

طلبات المدلل اوامر في جميع اللجان

يقال ان هناك ولدا مدللا دون اخوته.. كلما بكى على شي، تحول بكاؤه

الى امر ينفذ فورا.. و كلما طلب شيء حتى ولو كان ليس له اخذه.

وذات يوم بكى كل اخوته و طلبوا مرات و مرات ما يحتاجونه وما

لا يحتاجونه آسوه بآخيهم المدلل.. فلم يجد والدهم خير البكاء على

ضعفهما و قله حيلتهما في تلبيه ما يبغونه.. فذهبا للقاضي يشكوان

له الامر و يطلبان الحل.. فبكى القاضي فسآلوه لماذا تبكي؟

فقال على حالكم و حالي.. ثم ذهب القاضي يشكوا حالهم و حاله الى

قاضي القضاه فبكى معهم ، فقالوا مالك تبكي؟ فقال : على حالكم و حالي

ثم ذهب قاضي القضاه يشكوا حالهم و القاضي و حاله الى الوالي

..فآطرق الوالي براسه ثم خر ضاحكا..فتعجبوا من صنيعه.. فقالوا له

آتسخر منا؟؟ فقال لهم وهو يرفث برجليه من شده الضحك ( دعوا

الولد يفعل ما يشاء ..ترى ماعندك احد)

جاءت هذه القصه مطابقه لحاله تعامل اللجان العامله في اتحاد الكره

من اولها لآخرها مع النادي المدلل..فكلما بكى على اللي يسوى و اللي

ما يسوى، و اذا طلب اللي له و ما ليس له. سارعوا مرتجفين الى

تحويل كل ذلك الى آوامر تنفذ فورا..خشيه ازعاجه.

مين اللي يستحق الايقاف؟ هل الجريده صاحبه هذا المقال

ام الشخص اللذي ادعى و قذف الرئاسه بالفساد؟

ما قصرتوا يا شباب

شكرا لكل المدونين و المدونات الي ساعدوا في نقل المدونه

الاخت هديل الحضيف

و ان شاء الله ترجع لنا هديل بلباس العافيه

و الصحه وربنا يشفيها و يشفي

جميع المسلمين

اشياء في خاطري اقولها ٤

للآسف نشوف شاب يوصل الدوام بعد بدايه الدوام بساعه و يخرج قبل وقت الغداء

بساعه و يرجع قبل نهايه الدوام بساعه و يداوم ساعه،،

وبعد ما ينفصل من العمل يقول الكلمه المعتاده :

والله حطوني في راسهم عشان اني سعودي

كل شي في الدنيا ارتفع سعره الا سي دي الاغاني من روتانا ، تحيه

طيبه للاخ سالم الهندي مدير عام روتانا و اقول له

ياليت كل اصحاب الشركات و المدراء يراعوا العملاء مثلك.

الى متى و المدرسين مستمرين في الحضور الى

صالات الاسهم في البنوك؟؟

اتمنى من الاباء و الامهات  يعلموا ابنائهم شي اسمه الرفق بالحيوان

انتشرت ظاهره البنات اللي ييدخنوا والنتيجه في المستقبل

راح تكون امهات و مدخنات بشراهه و الله يخلي مراكز مكافحه

التدخين اللي حملاتهم و توعيتهم للرجال فقط..اما للفتيات بالسر

بدات حرب الاعلانات بين حقوق الانسان و وزاره الصحه

و المريض بيتفرج و النتيجه ولا شي

فلسفه فيلسوف غبي

اليوم راح اتكلم عن الفلسفة.. قصدي مو علم الفلسفة ..لأ ..قصدي

الناس اللي تتفلسف على الناس. راح احكي لكم قصة بسيطة صارت

لي اليوم في شركة ارامكوا في الظهران.

من كم يوم وانا احاول الاتصال بشخص معين ولكنه ما يرد على

تلفون مكتبه والبريد الصوتي لتلفونه رافض يستقبل أي مسج جديد.

المهم قلت ما في غير اني اروح له بنفسي ، وفعلا وصلت للمبنى اللي

هو فيه و رحت لجهه مكتبه وما لقيته. وكان فيه مجموعه من

الشباب اللي معاه في نفس القسم واقفين يتكلموا فرحت وسألتهم

عنه و اعتقد هالشي حاجه طبيعيه انك تسأل على شخص.

الشباب قالوا انه مو موجود لانه في كورس ف شكرتهم ولكن

واحد منهم الظاهر انه يبغى يسوي لنفسه شأن والمصيبه انه جا

يتفلسف على الشخص الغلط ، الأخ الظريف الطيب المطوع قام

يعلمني اصول العمل و يقول لي ترى زيارة الناس لها أصول ولازم

تعمل موعد مع الشخص اللي راح تزوره ( طبعا انا واقف اشوفه

بطرف عيني ابغى اشوف ايش اخرتها معاه ) وترى لازم تتطوروا

والين متى راح تظلوا همج ما تعرفوا تشتغلوا بطريقة بروفيشنال

زي العالم و جلس يتفلسلف بطريقة غير طبيعية ، والحمدلله

انه حتى الشباب اللي معاه مستغربين منه. المهم والأخ مازال

يعطيني درس الاخلاق رفعت يدي لراسي و اخذت العقال ،

( لا تخافوا ما ضربته ) و مديت يدي له وقلت له خذ العقال ،

الرجل استغرب و قال لي ليش؟؟ قلت له خذ العقال و اضربني و

قطعه فيني عشان تربيني بالمرة.

طبعا الرجال انحرج و وجهه صار الوااااااااان وقال لي مو

القصد اني أأنبك ( وطبعا غير طريقته في الكلام) و جلس يقول

ترى ارامكوا تعطينا رواتب عشان نخدمكم.. قلت له ياريت تاخذ

راتبك و تسكت. وطبعا في هذه اللحظات مر شخص ووقف عندنا

و سأل ايش فيه؟؟

وقلت له اني جاي أسأل عن شخص فقال لي اتفضل.. وعرفت ان

هالرجل هو مدير القسم وكان بصراحه في غايه الاحترام

وخلص الموضوع اللي انا جاي عشانه..

اتمنى انكم ما تاخذوا معنى كلامي ان كل موظفين ارامكوا سيئين..لالالالا

ترى فيه ناس منهم يعتبروا فخر للشباب ومفخرة للوطن..

و ياليت بعض الناس يبطلوا فلسلفة

 

 

رجعنا للأسهم مرة ثانيه

 

و كأنهم ما تأذوا منها .. الكل رجع لسيرة الأسهم ..والكل رجع

يفتي وان الكل عنده خبر على شركة معينه وان اسهمها راح

ترتفع و انتوا عارفين ان هالكلام كلام فاضي..

و بعد فترة راح نشوف العالم تبكي و يقولوا ليت اللي جرى ماكان

الله يعينهم و يهديهم.