جلسة البحر

امس بعد صلاة العصر قلت خليني اروح البحر و اجلس و أروق

و الجو كمان صاير حلو له كم يوم.

وقفت السيارة ونزلت وشايل معايا السجاده اللي راح اجلس

ومعايا الشاهي والمكسرات و جميع عدة الروقان.

طبعا 99 في المية من اللي جالسين عوائل وطبعا جلست

امشي الين شفت مكان كويس و حسيت انه احسن مكان

اجلس فيه.

المهم جيت اجلس وكان قريب من المكان عائلة وبدأو

في النظرات الغريبه اللي تهين أي اعزب

و طبعا انا ولا عبرتهم و جلست و اعطيت وجهي للبحر

عشان ما اشوف احد.

المهم يا دوب جلست جاني واحد وقال لي لو سمحت

قوم لان المكان هذا للعائلات.

قلت له تكلمني يا الطيب؟؟

قال ايه اكلمك انت

على طول رديت له وقلت له روح اتوكل على الله

و خليني في حالي.

طبعا استغربت من الشاب انه مسالم و مشى بدون

أي نقاشات تانيه.

جلست اتأمل في منظر البحر و مروق و الا شوية

اسمع صوت الدباب و طليت عليه الا ولد صغير

مررررررررة يعني عمره ما يعدي 5 سنوات

راكب دباب لوحده ومسوي رعب في المنطقة كلها

dsc00088.jpg

 

 

بس شكل الولد شقي بزياده لدرجه ان كل العوائل

خافت على بزورتهم و شالوا عيالهم عندهم.

طبعا البحر من ناحيه النظافه ماعندك احد

ولا اعتقد ان فيه أي تنسيق بين البلدية او المرور

لان انواع التفحيط شغال على الشارع الرئيسي

ولا عند الشباب احد.

وصورت لكم فنجان الشاهي لأن الشغالات الله يحفظهم

حسبوا اني رايح الهايد بارك وحطوا لي فناجين كريستال

234.jpg

بالله هادي فناجين يحطوها عشان البحر ؟؟

Advertisements

49 تعليق to “جلسة البحر”

  1. ياقلبي ابتسم Says:

    هههههههههههههههههههههههه

    الله يعينكم يالعزاب

    تزوج وريح نفسك ; )

    احلى شي الروقان على البحر وخصوصا لو الجو حلو

    والاحلى انه بحر الخبر 😦

    اهنيك على الجلسه الحلوة والرايقه

    جلسه مع النفس على البحر

    شي حلو 😀

  2. dubai85 Says:

    LOOL

    YbaaLY a9wer eStkaant ilB7er :P:p Maltna !!

    ilJaw ilyoam MooL 3ajeeB,, 6y7na 3la Ba7r o Felaail 3la Ramla : D

    Garb ilSheta Garb !!

  3. خالد العيسى Says:

    ههه

    تعجبني يارايق 🙂

    بس خلنا في البيالات، الشغالات عندهن بعد نظر، ويبونك تكشخ 🙂 اللي يشوفك بالبيالات هذي في البحر يقول ماشاءالله أجل كيف بيالاتهم في البيت

    😀

  4. asma Says:

    ماشاء الله حتى جلسات البحر صايرة مقسمة عوائل وشباب!!!!!
    طيب لو الواحد قاعد حاله حال نفسه اش الضرر؟

    من ناحية الدبابات
    استغرب ليش البلد هدي ما عندها قسم خاص بالدبابات؟
    مجرد كفرات قديمة يمديهم يصفوها على شكل حلبة خاصة بالدبابات والتفحيط اللي منه وانتهى الموضوع!!

    اما النظافة فمن جد شيييييييي مو طبيعي هنا!!
    كل واحد متعود يرمي زبالته على الأرض بحجة وجود اللي يشيلوها!!
    والكناس المسكين طووول اليوم يكنس ومع كدا القمايم ما تخلص!! استغرب من جد من حجم القمايم الموجودة في الشواراع والا الحدايق السعودية

  5. صالح Says:

    هههههههههههههه
    الطفش و ما يسوي
    بس كويش طلع مسالم
    و الا كان جيت فزعت
    الجو اليومين روعة

  6. محمد الصالح Says:

    مرحبا بالغالي 🙂

    يعني لابد تقهرنا !!

    طيب .. أنتم عندكم بحر .. وحنا عندنا نفود 🙂

    المرة الجاية .. لا تنسى تعزمنا .. نوسع صدرك شوي 🙂

  7. tala Says:

    لنا كم يوم كل ما نبغى نروح البحر يصير شئ
    😦
    وعزاب دائما منبوذين 😛
    ربك يعين

  8. سامي منصور Says:

    الله الله على الروقان بس ..
    جلسة بحر والجو جميل و شاعري الله الله الله … تصدق يا محمد
    نفسي أقعد على البحر هنا بجدة بشكل مطوّل لكن الوقت ما بيسمح لي حالياً
    لكن أكيد إن شاء الله الجايات أكثر … 🙂

    بس في شغلة ما استسغتها يا أخوي يا محمد منك في البوست هذا
    لما حكيت للشب (على طول رديت له وقلت له روح اتوكل على الله و خليني في حالي.) بس حبيت أعقب على هذه الشغلة يا محمد
    أوكى انت في حالك ومش مأذي أحد بس كانت الطريقة في وجهة نظري مش ولابد … ليش ؟؟
    لأنه هو قال لك لوسمحت .. يعني إجى بطريقة مهذبة …
    ومن ناحية ثانية
    لو انت كنت مكانه يعني قاعد انت و الأهل و ما خذين راحتكم و مستمتعين بالقعدة ويجي واحد و يقعد قريب منكم … مش راح يصير نفس الموقف تكلم اللي اجى يقعد جنبكم و تطلب منه إنه يغير مكانه ؟؟!!!صح ولا مو صح ؟؟

    بس وما تاخذ كلامي بمحمل الحزازية لانه هذه وجهة نظر ..

    أتمنى لك أوقات سعيدة في الجو الحلو هذا 🙂

    تحياتي و تقديري

  9. Mishari Says:

    الصراحة وناسة بس بنفس الوقت يا اخي مو حلو تحس نفسك منبوذ
    المرة الياية لبس واحد من ربعك نقاب وخله قاعد يمك
    🙂

    يعطيك العافية

  10. حامل المسك Says:

    هذه ضريبت الرفاهيه ياصاحبي
    مومهم الكاس المهم انوا يكون الشاهي عبى الراس
    حديثك عفوي وممتع
    كن بخير

  11. watar Says:

    يا قلبي ابتسم..

    ماراح اتزوج لاني كده مرتاح..

    بس معليش ملفي زي بحر جدة..بحر الخبر اللي عاجبك

    مافيه حتى امواج زي الناس

    dubai85 ..

    مافي احلى من الشتا ولا ايش رأيك؟؟

    خالد العيسى..

    خليتني اخاف من عيون الناس..هههههههه تسلم يا سيدي

  12. watar Says:

    asma..

    لازم تعرفي ان اكتر المصايب تجي من العزاب..

    وعلى النظافه حدثي ولا حرج

    صالح..

    يبغالنا يوم نرتب طلعه حلوة على البحر و نغير جو احنا و الشباب..

    محمد الصالح..

    ابشر يا عمي ولا يهمك..انتظرك ولك احلى طلعه ياشيخ

    وشرفتني بمرورك واتمنى انك تزورني دائما ياغالي

  13. watar Says:

    tala..

    ربنا يهنيكم في طلعتكم ان شاء الله

    سامي منصور..

    اخوي سامي انا مستحيل ازعل منك لاننا اخوان ..بس يا سيدي هذولي

    الاشكال انتا لو بينت معاهم انك طيب و حترمهم راح يفتروا فيك..

    فلازن تبين انك واحد عصبي و اقشر عشان يعمل حسابك

    Mishari ..

    لا تدقق..

    حامل المسك..

    تسلم ياخي

  14. حلمي معي Says:

    ايش هذا الروقان يا رااايق
    انا احلى شي عندي اجلس في البحر لحالي واتامل فيه ويمكن اقعد 3 ساعات ولا احس بالوقت

    مادام انت عزابي روح مع اهلك ومشهم وانت بعد عنهم شوي وادخل جو مع البحر عشان مايجي لك واحد يعكر مزاجك ويقول لك مكان عوائل

    صراحه ما ادري وين يروحون الشباب بس لو هم يكونوا مادبين شوي ولا يؤذو احد كان المجتمع سمحلهم يكونوا في اي مكان ولا يكون شي اسمه للعوائل
    الله يهديهم الشباب هم يخربوا على نفسهم ويضلمون شباب ثانيه تخاف الله ومادبه وفي حالها

    بس هذا مصيركم يا الشباب الله يهديكم بس

    ورحله موفقه اخوي محمد

  15. Emad Daghreri Says:

    أنا معك

    الجو أمس كان شئ ثاني لطيف وغير معتاد “على الأقل خلال الأيام الحالية” لكن بيجي برد الحين يوريك ويورينا الويل . الصبر الصبر

  16. أنمار Says:

    أسلوبك مضحك
    هههههه
    الله يعينك

  17. بحرينية Says:

    خوش استكانة و القعده على البحر شكلها كانت تمام خصوصا و ان الجو صاير حلو حتى عندنا
    بس السؤال يقول : هل كنت مستعد لهوشة لو الرجل ما كان مسالم و ماخلاك ؟؟

  18. mbet0hm Says:

    وااااااو والله من زماااااااان عن البحر 😦 قلت ماقلت خلونا نروح البحر قالوا والبزران بيأذونا 😦 لية مانروح لحالنا بدون بزران 😦 .. ونروق

    احلى شئ سويته رحت البحر لان الجو خطيييييييييييييير

    غريبة ماصورت البحر ^_^ لان أهل الرياض يا حرام ماعندهم بحر خلنا نرويهم اياه خخخخخخ >> ماتشمت ابدا

    وعلى طاري مكان العائلات من زمااااااااااااااااان من زماااااااان لما رحنا البحر اتذكر اخوي الكبير مر على جهة كلها شباب وقال انها منطقة العزابيه ورحنا مكان ثاني كان للعائلات 😦 حتى البحر راح يفصلونه والله مشكله هذي ..!! ودي اقول بلد متخلف بس ماراح اقول ^__^ بسكت ..

    بس البزر اللى يلعب شكله متمرس ومستحيل عمره 5 سنوات يمكن 10 بس شكله صغير 🙂

    واما البيالات الشاي ( على قولتك فنجان بس الفنجان تبع القهوة والبياله حقت الشاي او استكانه ) ماعلينا ..

    مساكين الخدامات كثر الله خيرهم يبغون يخلونك تنبسط اكثر وحطولك الكرستال خخخخخخ

    ولو ماحطولك الكرستال كان ماقدرت تصور البياله بس لانها كرستال تطلع احلى مع الصورهـ

    سوري على الاطاله بس البياله عجبتني

    كل رحلة وانت بخير

  19. mbet0hm Says:

    ترجمة قاموس مضيعه

    قلت ماقلت= كل ماقلت

  20. أدهم Says:

    أما هاد الولد صاحب الدباب من جد بيخوف

    شهيتني محمد أقعد على البحر

    الله يهنيك ويوفقك 🙂
    تحياتي
    أدهم

  21. عابرة Says:

    البحر افضل صديق
    ومكان قمة في الروعة ،،
    حتى لو ما فيه أمواج
    المهم
    ريحة بحر ،،
    وليت الناس تفهم قيمته وما يوسخونه

    بوست له مذاق البيالات البحرية 🙂
    احترامي

  22. watar Says:

    حلمي معي..

    في كثير من الاوقات الانسان يكون محتاج انه يقعد رايق و يتأمل في الدنيا..

    ودائما الخير يخص و الشر يعم والشباب المزعجين سببوا كثير من الاحراجات

    للشباب الثانين..

    Emad Daghreri ..

    اول شي لا تنسى اجتماع المدونين يوم الربوع الجاي..وياما احلى البرد..

    انمار..

    وانتا تموت من الضحك هههه

  23. watar Says:

    بحرينية..

    اكيد والحمدلله احب اكون مستعد لأي شي..وشكرا على تشريفك المدونة من بعد غيبه

    mbet0hm ..

    خذي البزورة و روحي عشان تنبسطوا

    ادهم..

    لا تفوت جلسه البحر و خصوصا هادي الأيام تراها مررررة حلوة

    عابرة..

    كلك ذوق

  24. SHAHAD Says:

    وااااو حدك شوقتني لمثل هذي الجلسة
    عاد بحر والجو حلوو وبروحك .. حدة ونااسة
    بس ضحكني الشاب اللي يالك وقال مكان للعائلات لوول
    الشباب حقهم مهضوم بهالسوالف .. قلبي عليكم
    بوست جميل وممتع

  25. غيداء Says:

    قبل لحظات تذكرت البحر واشتهيته
    صدف فتحت البلوق حقك وقريت البوست

    البحر شي ثاني
    و خاصه مع فيروز ” شايف البحر شو كبير ” بالنسبه لي

    🙂

  26. m3anq Says:

    والله صارت السالفه الحين عادي شباب عوائل الكل يجي ويجلس ودوبه من دوب حاله

    يعني قليل تلقى احد يمنعك

    واكبر دليل الشاب اللي جالكـ كلمك ومشى بهدوء

    تحياتي

  27. عبدالرحمن محمد Says:

    هذا حال الدنيا ، العزاب دايم مغلوب على امرهم
    اهم شي تكون انبسطت

  28. simple abady Says:

    موضوع فعلا يستحق التفاعل

    أين يذهب العزاب في بلادنا

    شكله حيكون عنوان صارخ

    المشكلة في الحثالة غيير المحترمة التي أفسدت على الشباب الطيبين من امثالك

    انا متزوج وعندي عائلة

    وباقول لك على موقف حصل لي عند مطعم شيليز

    كنت جالس انتظر يجيبون لي العشا سفري … طبعا كنت وحدي … وشوي يجي مجموعة بنات … وشوف انواع الدلع والميوعه .. والمكاييج

    ويجلسون قدامي

    سوي الا ويجي سيارة وتوقف امام المطعم وحاول يكلم البنات او يرسل لهم بلوتوث وهم يتضاحكون بس ما اعطوا الشباب وجه

    شوي الا ويطلع واحد منهم من السيارة ويصيح …

    انا رقمي صفر خمسة اربعة … وجلس يعطيهم الرقم قدام الناس كلهم

    انا والله حسيت اني اغلي

    الى هذا المستوى بلغنا من الانحطاط

    لا عيب

    ولا حياء

    ولا حرام

    هل المشكلة في الشاب

    ام في البنات

    ام في المجتمع برمته

    لا أدري

  29. فيصل Says:

    السلامـ، عليكمـ،
    أسجل اعجابي بقلمك هذا ، ناقشت عدة قضايا بأسلوب رائع وتحت مظلة واحده .ررائع ما كتبت
    🙂

  30. watar Says:

    SHAHAD ..

    انصحك بمثل هالجلسه ولا تفوتيها روحي قبل ما يجي البرد

    غيداء..

    شفتي البحر شو كبييييييييييييييييير

    m3anq..

    الحمدلله انه مشى ولا كانت صارت مشكلة كبير

  31. watar Says:

    عبدالرحمن محمد..

    شفت كيف احنا مساكين؟؟

    simple abady..

    العزاب مالهم الا القهاوي و يحرقوا قلبهم بالشيشه..

    ولسه ياما راح تشوف من الاشكال هادي

    فيصل..

    تسلم يا سيدي

  32. LaRa LuNa Says:

    اخ يالقهر كل من جاب طاري البحر انقهررررررررررررررررررررر 😦
    والله نياااالكم يا اهل السواحل
    وعاد بحر مع جو خطير مع روقااان اكتمل مثلث المتعه بصراحه
    بس والله كشخه بيالاتكم 🙂 تسلفني وحده 🙂

  33. Gasi Says:

    هههههههههههه

    ياخي يحبون يدلعونك ويحسسونك باهميتك المعنوية
    انت ليش متضايق
    بس عن جد ضحكتني بسالفة الفناجيل 😀

    وبصراحة الجو هالايام صاير فظيع وبارد يستاهل ان الواحد يروح فيه يقعد على البحر
    انا صار لي يومين انام ودريشة غرفتي مفتوحة بصراحة 🙂

    يعطيك العافية واهم شي روقت وخلصت دلة الشاهي وبالعافية مؤخرا

  34. عابر سبيل Says:

    والله حالتنا ( العزوبية ) صعبة
    ما خلولنا مكان نروحله

  35. barrak74 Says:

    حلوه فناجين الكريستال والهايد بارك

    ههههههه

  36. فتاة الحزن Says:

    هههههههه

    والله ما أدري يمكن العزاب من كوكب ثاني وأنا ما أدري..

    ..

    أهم شي إنك استمتعت .. حلوة قعدة البحر

    بوست رايق مثل صاحبه

    🙂

  37. relaaax Says:

    يالله اهم شي استمتعت بهالطلعة وجابلت البحر .. وشكيت له همومك .. ترى البحر يحس مثلنا ==> هذا من تأليفي الخاص .. بس جد احسه يسمع حق كل الناس ولا يتذمر :)))

  38. watar Says:

    LaRa LuNa ..

    ان شاء الله تنقلي على مدينه تطل على البحر عشان تبسطي

    Gasi ..

    اتمنى انك تستغل الجو الحلو ولا يروح عليك هدر

    عابر سبيل..

    لا تدقق

  39. watar Says:

    barrak74..

    شكرا لك

    فتاه الحزن..

    ما سمعتي عن كتاب الرجال من المريخ و النساء من زحل؟؟

    relaaax ..

    لازم نرمي همومنا في البحر..ولا كيف راح يصير بحر؟؟

  40. بنت الروح Says:

    ماشاءالله اجل سيرت على البحر ,, الله لا يغير علينا هالجو
    احس اللي يروح هناك ويكون مهموم يروح عنه الهم
    اللي يروح وهو زعلان يتغير ويستانس
    يعني من جد جو البحر و هوا البحر يوديك عالم ثاني

    >>شهيتني اروح البحر بس ماحولك احد ,, مافي حد يبي يوديني

  41. watar Says:

    بنت الروح..

    اميييييييييين.. انصحك تروحي وتغيري جو

  42. سلطان Says:

    أبو حميد ..

    بصراحة تدوينة لذيذة وبسكوته بصراحة 🙂

    بس أحس فيها نقص

    أمممممممممم

    ممكن ما عطيتنا نماذج من ابيات الشعر الي كتبتها ؟!

    بتقولي ما كتبت ؟!؟! معليش ما راح اصدق لان عندك اسباب كثيرة تخليك تكتب شعر

    اما على الجو

    والا بيالة الكرستال

    والا راعي الدباب

    والا العزوبية 😦

    والنظافة وو و و

    اشياء تقهر وتخليك تكتب هجائية تروع 😦

    موفق حبيب ألبي

  43. watar Says:

    سلطان..

    والله ما كتبت شي ولو كتبت ماكان بخلت بالقصيده عليكم..

    و اتمنى اشوف منك قصيده في اقرب وقت

  44. البندري بنت خالد Says:

    فعلا الجو طيب هالأيام وكلنا في انتظار طلعات البر

  45. watar Says:

    البندري بنت خالد..

    كلنا في انتظار طلعات البر طال عمرك و شكرا لمرورك اللي افتقدته من فترة طويله

  46. fatmaqatar Says:

    ياااعيني على مزاجك بوجاسم ^_*

    لووولز زين سويت فيهم ;p

    لووول يحليل شغالتكم مدلعتك XD

    أيامك سعيده ^_^

  47. watar Says:

    fatmaqatar..

    ربي يسعد لي ايامك

  48. ندوووشـــــــــأأ Says:

    هههههههههههههههه عجبني المووقف لماا الرجاال قلك لوسمحت وخرر فيه عواايل هـــــــع شككككككككككككككككككككككككككراأأأأأأأ ع الموووووووضوووووع الجمييييييييل هخ

  49. watar Says:

    ندوشا..
    ناس ماعندها ذوق..قال عوائل قال.. الله يحييك في المدونه

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s


%d مدونون معجبون بهذه: