Archive for 29 مايو, 2008

ذكرياتي مع التعليم

مايو 29, 2008

مضيعه بيتهم كالعاده ما تقصر و تعرف كيف تمتحن المدونين بواجباتها الخفيفه

و واجبها اللي مررته علينا المره هادي هو عن ذكرياتنا مع  التعليم..  و الله يا

لي اكثر من ١١ سنه متخرج من المرحله الثانويه وما بقت في ذاكرتي الاالشي

القليل وكلها مصايب و مشاكل،، على العموم خلوني اجاوب لكم على الآسئله.

١- افضل مرحله تعليميه درستها؟

اكيد في دبي في الجامعه الامريكيه واللي خلاها ممتعه صديق عمري بندر و

و لد عمه و كل الشباب و كل هيئه التدريس في هذي الجامعه العريقه.

و احلى شي في هالجامعه انك تحس انك في وسط اهلك و الكل  قريب  من

بعض سواء طلاب او مدرسين.

٢- اسوآ مرحله تعليمه مرت عليك؟

والله كل سنه كان يمر فيها وقت سيء و خصوصا بحضور المدرسين و

اللي عندنا و لكن المرحله اللي كانت علي و على جميع الطلبه في الثالث

الثانوي و السبب تغيير مدرس الفيزياء ٤ مرات خلال سنه دراسيه وحده

٣- افضل المدرسين اللي مروا عليك؟

د. وسيم قباني  و miss. melissa  و بس

و  اتمنى اني ا تذكر مدرس  طيب درسني  في  المدرسه بس مافي غير

الاستاذ الشيخ ابراهيم منصور في منارات الشرقيه و الثاني اسمه استاذ

حسام في جده.

٤- احب المواد الي درستها؟

الرياضيات

٥- اكره المواد اللي مرت عليك؟

القواعد و القواعد ثم القواعد .. وبسبب الكل مدرسين القواعد اللي

مروا علي،، الى الان ما اعرف اعرب اي جمله او اي شي تحته خط.

٦- اخر شهاده حصلت عليها و تخصصك؟

بكالريوس من الجامعه الامريكيه بلندن ،، اداره اعمال

٧- اطرف موقف مر عليك في دراستك؟

كثيييييير وخصوصا اني كنت طالب مشاغب من الدرجه الاولى.

٨- اصعب موقف مر عليك في دراستك؟

حضوري  الامتحانات  النهائيه في الثالث الثانوي  وانا متكسر

بسبب حادث شنيع قبل الامتحانات ب اربعه ايام و النتيجه دور

ثاني في الكيميا و الفيزيا بس الحمدلله نجحت.

اتمنى اني اكون حليت الواجب بشكل خفيف و استروا ما واجهتوا

الاشاره حمرا

مايو 25, 2008

ماشالله تبارك الله على الزحمه اللي جالسه تزيد في المنطقه الشرقيه

و طبعا صرت لمن توقف في اشاره راح يطول الوقت معاك شويه

وراح تشوف سيارات يمينك و شمالك و كمان راح تشوف تصرفات

الناس اللي راكبين السيارات اللي جمبك.

مظهر صار شبه مآلوف لمن تشوف واحد ومعاه زوجته و اولاده

في السياره و تحس انه جالس يصرخ عليهم و حركات يده كلها

تدل على العصبيه اللي هو فيها.. وكمان بتشوف سياره فيها

شويه بنات حلوين و الشباب اللي في السياره اللي جمبهم

فاتحين الشباك و مشغلين البلوتوث و انواع الترقيم التقني

و الغلبان منهم تلاقيه كاتب رقمه في لوحه ورق و تلاقي اسمه

ابو هاجوس..هههههههه

و احلي شي يموت من الضحك لمن تشوف واحد اسمر .. او

باللهجه المحليه نقول ،، خال ،، و الخال يعني عبد اسود

و كلنا عبيد ربنا،، تلاقيه مشغل المسجل و معلي الصوووووت

على الاخر و جالس يرقص و يهز جوه السياره.

و من الممكن كمان انك تشوف واحد سرحان بخياله و يده

في مكان ما في وجهه يدور على شي ضايع من مخه وشي

طبيعي انك بعض الاحيان و في عز الحر تلقى ٢ شباب

نزلوا من سيارتهم و يتضاربوا مع بعض لمجدر العناد

و قليل جدا يكون فيه انسان يستغفر الله من اللي جالس

يشوفه.

و تشوف ناس و ناس و ناس من كل طبقه وكل شكل

وكل لون..و الدنيا تدور فينا و انصح كل واحد يتامل

الناس اللي حواليه لمن تكون الاشاره حمرا.. و يقول

الحمد لله على احنا فيه

انطونيو …. صار اسمه علي

مايو 23, 2008

الحمدلله.. و اخيرا دخل زميلنا انطونيو الى الاسلام و الفضل

بعد الله يعود للصديقي عبدالوهاب

و فضل انطونيو ان يكون اسمه الجديد

علي

اهلا و سهلا بك في الاسلام يا علي

قصيده.. رساله

مايو 23, 2008

اطلب اللي تريده من عدن و المكلا

و اطلب الدم اللي باقي معي في الشرايين..

قامتك غصن يسقونه  على نهر دجله

ساجي الطرف سنك تحت خمسه و عشرين

كل شي فيك زين وانت من الزين احلى

يخضع الزين لك يا سيد كل المزايين

خذ عيوني ولا حاجه على الزين تغلى

انت اغلى من الغالين يا سيد المحبين ،،ساجي الطرف سنك تحت خمسه و عشرين

كل ما جيت عنده ،قال اهلا و سهلا

غايه القلب لا قد شاف سيد المظانين

وان بلقاك خلى القلب ،،يفرح و يسلا

قل لابو بكر،، ابو بكر سالم..تاليتها الى الطين

خذ عيوني ولا حاجه على الزين تغلى

انت اغلى من الغالين يا سيد المحبين

كلمات : بن عبود ،،،  اهداء الى الفنان الكبير ابو بكر سالم

استحي على وجهك

مايو 18, 2008

الى جنان الخلد يا هديل

مايو 16, 2008

اليوم و كعادتي عند زياره المدونات .. اول مدونه ازورها هي مدونه بندر

و لقيت فيها الخبر الحزين بان اختنا هديل الحضيف انتقلت الى رحمه الله

اللهم ارحمها و اعف عنها و ثبتها عند السؤال

و نقها من الذنوب والخطايا كما ينقى الثوب الابيض من الدنس

مبرووووك و الف مبروك لفريق الشباب

مايو 15, 2008

فاز فريق الشباب الشقيق على فريقنا فريق الاتحاد

ومع ان الهزيمه قاسيه لكن ربي يبارك لفريق الشباب

و احب اهني الشيخ خالد البلطان على الفوز

خدمات ما بعد البيع

مايو 13, 2008

طبعا العنوان اللي فوق دائما نشوفه في ركن بعيد او مظلم

او بالاصح ما تقدر تشوفه في داخل اي شركه او مؤسسه

عندنا في الدول العربيه.

وكلنا عارفين ان خدمات ما بعد البيع جدا سيئه ماراح اظلم

جميع الشركات و اقول كلهم.. يعني يمكن بس بنسبه ٩٩ في

الميه منهم بس.

و مافي احد مننا الا ومر بتجربه سيئه اقل ما يمكن اننا نقول

عنها انها ممكن تخلي الواحد شعر راسه يشيب واللي اصلع

ممكن ينجلط من الخدمه المقدمه له..

و طبعا كل الوكالات عندنا يهتموا اهتمام كبيييييييير و همهم

الوحيد هو البيع ثم البيع ثم البيع و فقط البيع وزياده مبيعاتهم.

يعني سواء اشتريت شي غالي او رخيص كله نفس الشيء من

الخدمه .. واذا دخلت اي معرض او اي محل تبغى تشتري

غرض معين راح تلقى البائع شويه و يحسسك ان منتجهم هو

الشي الوحيد اللي في الدنيا من نوعه وانهم يهتموا بعملائهم

بشكل غير طبيعي و و و ،

وطبعا اول ما تشتري اللي تبغاه راح تشوف شي عمرك ما

شفته لو خرب عليك .. يعني مثلا مده التصليح راح تاخذ

وقت غير طبيعي يعني مثلا لو انك متزوج و زوجتك حامل

في بدايه حملها .. من الممكن جدا انها تولد و يجيك الطفل

و جهازك لسه ما تصلح.. واذا رحت تشتكي طبعا احلى

عذر راح تسمع كلمه (سوء استخدام ) ،و احسن شي عشان

تاخذ حقك انك تراسل الشركه المصنعه بالخارج عشان يا خذوا

لك حقك من التاجر الجشع و اداره شركته اللي كلهم

يا .. سديق كتعه لسه مافي يزي

او .. بص حضرتك ،، او ياخيو ،،

واذا كان المسؤول واحد من اولادنا راح يقول لك

روووووووووح و اعلى ما في خيلك اركبه


مبروك لك يا عميد

مايو 11, 2008

يا قاهرهم

مبروووووووووك

الف الف الف الف مبروك لك الاتحاديين

الاتحاد X الهلال

مايو 11, 2008

راح تكون اليوم ان شاء الله مباراه فريقنا الكبير فريق الاتحاد ضد فريق الهلال

و اتمنى ان الاتحاد يفوز و يعلم الهلال درس ما ينساه طول العمر

و لكن الخوف من عده عوامل اهمها التحكيم اللي دايما يحب

يعطي وقت اضافي بزياده عن المفروض و ما يصفر الا لما

الهلال يجيب هدف شرعي او غير….

برقعوهم

مايو 9, 2008

يعني كان لازم تبرقعوهم..

طيب شيلوا الصوره و حطوا صوره كبيره لادوات التجميل

او حطوا صوره بنات صغار يعني مثلا بنات اعمارهم

تكون اصغر من ٦ او ٥ سنوات

عشان لايجوا ناس و ناس

يجبروكم يا اصحاب المحلات على

تغيير ديكورات المحل

ايقاف جريده الرياضي

مايو 8, 2008

تم وقف اصدار جريده الرياضي بدون اي انذار او تحذير

و كلنا عارفين ان جريده الرياضي يمتلكها عميد النمور

الشيخ منصور بن حمدان البلوي

وهذا طبعا احد اهم اسباب و قف و منع اصدارها

و السبب الثاني انه كان في مقال يحكي قصه

طفل مدلل بين اخوانه و طلباته دائما تنفذ

و كلنا عارفين ان هذا المدلل هو النادي الازرق

و المقال بصراحه جدا قوي وفي الصميم و في الاسفل

نقلت لكم المقال و في انتظار تعليقاتكم

الرياضي – جده

ماعندك احد..

طلبات المدلل اوامر في جميع اللجان

يقال ان هناك ولدا مدللا دون اخوته.. كلما بكى على شي، تحول بكاؤه

الى امر ينفذ فورا.. و كلما طلب شيء حتى ولو كان ليس له اخذه.

وذات يوم بكى كل اخوته و طلبوا مرات و مرات ما يحتاجونه وما

لا يحتاجونه آسوه بآخيهم المدلل.. فلم يجد والدهم خير البكاء على

ضعفهما و قله حيلتهما في تلبيه ما يبغونه.. فذهبا للقاضي يشكوان

له الامر و يطلبان الحل.. فبكى القاضي فسآلوه لماذا تبكي؟

فقال على حالكم و حالي.. ثم ذهب القاضي يشكوا حالهم و حاله الى

قاضي القضاه فبكى معهم ، فقالوا مالك تبكي؟ فقال : على حالكم و حالي

ثم ذهب قاضي القضاه يشكوا حالهم و القاضي و حاله الى الوالي

..فآطرق الوالي براسه ثم خر ضاحكا..فتعجبوا من صنيعه.. فقالوا له

آتسخر منا؟؟ فقال لهم وهو يرفث برجليه من شده الضحك ( دعوا

الولد يفعل ما يشاء ..ترى ماعندك احد)

جاءت هذه القصه مطابقه لحاله تعامل اللجان العامله في اتحاد الكره

من اولها لآخرها مع النادي المدلل..فكلما بكى على اللي يسوى و اللي

ما يسوى، و اذا طلب اللي له و ما ليس له. سارعوا مرتجفين الى

تحويل كل ذلك الى آوامر تنفذ فورا..خشيه ازعاجه.

مين اللي يستحق الايقاف؟ هل الجريده صاحبه هذا المقال

ام الشخص اللذي ادعى و قذف الرئاسه بالفساد؟

مجموعه ابو نواف

مايو 4, 2008

من اكثر المجموعات اللي تعجبني و المجموعه الوحيده اللي مشترك فيها هي

مجموعه ابو نواف البريديه

اليوم وصلني ايميل منهم مره حلوه يحث على اتباع سنه نبينا

و حبيبنا محمد صلى الله عليه و سلم

و طريقته مره حلوه في تبسيط السنه وهذي بعضها


و للمزيد يمكنكم زياره الصفحه لمشاهده بقيه الصور

بالضغط هنااااااااا

ما قصرتوا يا شباب

مايو 1, 2008

شكرا لكل المدونين و المدونات الي ساعدوا في نقل المدونه

الاخت هديل الحضيف

و ان شاء الله ترجع لنا هديل بلباس العافيه

و الصحه وربنا يشفيها و يشفي

جميع المسلمين