العالم في السوق

في الفتره هادي يكثروا البنات في الاسواق سواء اللي يبغوا

يشتروا او اللي يبغوا يتمشوا او عشان يغيروا جو .. وطبعا

الواحد بيشوف برضوا شباب ولكن راح اتكلم عنهم شويه

بعد البنات. واحس ان البنات عايشين في عالم مافيه احد

غيرهم  وصرنا   نشوف  اشكال   عليها  العجب و انواع

البراقع  و العيون اللي مكحله و الشباب مساكين وراهم و

اعتقد ان هالبنت اللي متبرقعه لو كشفت ما راح تلاقي لو

حمار  يطل فيها  وهذا الشيء مؤكد على نظريه ياما تحت

السواهي دواهي … و فيه بنات مقاريد حتى لو اتبرقعت و

لو سوت اللي تسويه بس اهم شي انها مقتنعه انها وحشه

و مقتنعه  بالمثل الحجازي القديم اللي يقول

قالوا للقرده اتبرقعي .. قالت وجهي متعود عا الفضيحه

و كمان الواحد بيشوف ماشالله تبارك الله بنات متحجبين

و متسترين و لكن ماشالله يكون  مبين الجمال الرباني و

الجمال الاخلاقي في البنت. وعن نفسي استغرب من بعض

البنات  اللي يتكلموا  مع  بعض بصوت عالي و السوق كله

بيسمعهم و الضحك  على الاخر  كي كي كي . و ها ها ها

و برضوا بتشوف بنات جالسين في مقهى و اخذين الطاوله

اللي في  الزاويه و  جالسين  بيدخنوا ولا معطين اي اهتمام

لاي احد. واكثر شي يزعلني يا ناس لمن يكون اب غلبان في

السوق ومعاه بنته و تمرمط فيه من محل الى محل و انواع

الزعل  لو ما  اشترى لها  اللي تبغاه… وعاد العبايات ماراح

اتكلم عنها لانها موضوع كبيييير و يبغاله بحث و تحري في

عالم العبايات.

نجي للشباب

شله من ٣  بزوره  عفوا قصدي شباب ما قبل العشرين ..

الشعر كدش يعني مكنوش و يمكن يكون ما غسل شعره

من ٣ او ٤ شهور و الحلق في اذنه و البنطلون طايح و

جالسين يتفرجوا على الرايحه و الجايه و لكنهم مؤدبين

بس بيتفرجوا. و مجموعه ثانيه مكونه من شبشبين عفوا

قصدي شابين بيلحقوا بنتين و يبغى يعطيها رقمه بالقوه.

وبرضوا  واحد  هناك  كاشخ  لوحده  وكل ما مرت بنت

يتميلح عليها و يرمي كلمه غزل يمكن قلبها يحن عليه و

ترد عليه بكلمه.. و واحد  ثاني  جريء لدرجه انه بيروح

للبنت و امها معاها و يجي جمب البنت وما يعطيها رقمه

في ورقه. لا لا لا…. هذا  يوقف مع  البنت  وهي  بتطلع

جوالها  من الشنطه و تخزن رقمه بشكل عادي وهذا اذا

ما عزمها على فنجان قهوه في نفس المركز.

وفيه شباب ما يحب يدخل المراكز .. نلاقيهم بره المركز

منتظرين بره في سياراتهم لانهم بيخافوا على البنات و

يحبوا  يوصلوهم  في  موكب  اكبر  من موكب الرئيس

الامريكي نفسه الى بيتهم خوفا على اعراض الناس..

و للحديث بقيه..

Advertisements

32 تعليق to “العالم في السوق”

  1. Shada Says:

    أكره الأسواق …
    على فكرة حتى الشباب الي يعاكسو وحشين على قول المثل المشتق :
    قالوا ياقرد لاتعاكس بنات الناس .. قال يمكن ألقط نصيبي !

    مشي حالك

  2. afnan Says:

    الواحد يكره المكان و السبب هالتصرفات
    الله يهديهم جميعاً

  3. الإعصار الأحمر Says:

    بصراحة في جدة الترقيم و الأشياء دي كلها عيني عينكـ

    بس في ناس برضو محتشمين ومحترمين

  4. تركي يونس Says:

    الله يحمينا من الشرور

    الأشياء هذي منتشرة في كل مكان
    ربنا يحمي الشباب والشابات ويعقلهم

  5. زاحـــفـ الى المجهـــول ــه Says:

    لسه بتشوف اكثر واكثر ..

    الله المستعان ..

    اسعدني تواجدك بمدونتي ..

    زاحفه

  6. mbet0hm Says:

    بصراحة هالزمن زاايد البنات والمصخرة بشكل كبييييييييييييييييرة وملحوظ مرة 😦

    لازم يشوفون حل للبنات اللى اهلهم مو دارين عنهم
    والله يا محمد ثلاث ارباعهم يدخلون ويطلعون من البيت اهلهم مايدرون عنهم ابدا حتى ممكن تنام برا البيت الاهل مو سائلين عنها ..
    وصح المتبرقعات لما تفصخ النقاب حقها بدورة المياة الله يكرمكم تشوف منظر القباحة استغفر الله العظيم ،، واكبر دليل احد مدرساتي بالمدرسة لما شفتها بالحمام وافصخت البرقع انصدمت مرة انها اهي المدرسة اللى نشوفها كل يوم الصباح بوجهة الطبيعي 😦

    الوضع يزداد سوء

    الله يصلح الجميع يارب العالمين ..

  7. senoritalm Says:

    اهلين واتر بصراحة هذي الاشكال موجوده في كل مكان وزمان سواء عطله او دوامات

    الله يهديهم بـــــس….

    استمتعت بالتصور الي اعطيتني اياه كأني رحت السوق هههههه

  8. watar Says:

    shada..
    المثل اللي ذكرتيه حلو كتير وربنا يعيننا على الاشكال اللي نشوفها

    afnan..
    امييين

    الاعصار الاحمر..
    المحترمين في كل مكان بس الصيع اكثر و ياخي الكريم للمره المليون اقول لك
    لا تكتب اسمك تحت الرد اللي تكتبه لامه ينكتب بطريقه تلقائيه و ياليت لا تكررها
    عشان لا يجي احلى بلوك في قفاك

  9. watar Says:

    تركي يونس..
    يا هلا فيك

    زاحفه..
    انا اللي يشرفني تواجدك و يشرفني زياره مدونتك الحلوه

    مضيعه..
    ولسه ياما حتشوفي

    senoritalm..
    شكرا لك و لتواجدك

  10. smilefirst Says:

    وين ماتروح في هيك و في هيك ..
    الله يحمينا و يهدينا أجمعين ..

    عجبني هالمثل ..
    قالوا للقرده اتبرقعي .. قالت وجهي متعود عا الفضيحه
    و منكم نستفيد ..

  11. الحلم الوردي Says:

    الله المستعان

    ما تغيرنا مع ان الدنيا تغيرت

    احس هالسوالف صارت حركااااااااات جديمة نحن اكبر منها وتعديناها

    استصغر النوعية هذي

    الله يهدينا يارب ويثبتنا

    يعطيك العافية وتر

  12. Exganza Says:

    هذه المناظر اللي كرهتني في الأسواق
    بنات مفلوتات وشباشب تلحق وراهم … بس باقي نحط لهم عزيزه
    هذا الوضع ماراح يتعدل الا بالشده …

  13. watar Says:

    smilefirst..
    شرفني مرورك

    الحلم الوردي..
    الله يعافيك

    Exganza..
    ايش قصدك بالشده؟؟يعني يضربوهم مثلا؟؟

  14. ((*خـــــوخه*)) Says:

    ههههههههههههههههههه
    شر البليه ما يضحك 🙂
    الحمد لله
    الله يهدي من خلق

  15. هذيان Says:

    يااك تسبب لي أزمات نفسيه الاشكال
    😦

  16. ثامر الطويرقي Says:

    من راقب الناس مات هماً ..

    ثامر الطويرقي >>>> بس بأقهرك

    وحلوة بلوك في قفى (الاعصار الأحمر) – فطستني ضحك

  17. Broken Wing Says:

    دايما كنت اسال البنات الحين الشباب راضيين لانفسهم انهم يتغزلوون بس مايرضوون ان احد يلمس اخواتهم ؟؟ بس الحين ما توصل لحالة ان الاخو ما يرضى على اخته توصل ان الاخت الكبيره ما ترضى على اختها الصغيره … طيب شوفي حالك انتي وش تسووين يعني ما ترضين لاختك بس انتي حلال عليك ؟؟

    مادري الين متى اهم على هالحاله .. واللي يقهرني ان خوفهم بس من سمعة اهلهم طيب ليه ما تخلوون خوفكم من ربك قبل خوفكم من اهلكم لا يدرون عنك..

    الله يهديهم ولا يبلانا

    بوست اكثر من رااائع يا اخووي 🙂

  18. بشوره Says:

    هههههههههههههههههههههه

    الله يرجك يا شيخ 😀

    الله يهدي الجميع
    الاهل ثم الاهل ثم الاهل
    هم السبب 😦

  19. شموخ ملكة Says:

    من جد .. تشوف العجب في السوق ..

    الله يصلحهم ويهديهم ..

  20. watar Says:

    خوخه..
    امين و يهدي الجميع

    هذيان..
    ازمه نفسيه لكل العالم

    ثامر الطويرقي..
    ربنا يسعدك و ان شاء الله اشوفك تضحك على طوووول

  21. watar Says:

    Broken Wing ..
    ربك يعين

    بشوره..
    ربنا يهديهم ويهدي اهلهم كمان

    شموخ ملكه..
    امين

  22. عابرة Says:

    فعلا الأهل هم السبب

  23. أبو سعد Says:

    سلم لي على الأخلاق والتربية…

    كثييييييييييييييير السلام

    تحياتي؛؛؛

  24. watar Says:

    عابره..
    شكرا لمرورك

    ابو سعد الاصلي..
    انتا اللي سلم لي علي الاخلاق يا ابو الاخلاق

  25. أماني Says:

    << الضغط مرفوع عفوآ

    اول شي ناس متخلفه

    تمام

    لانه من الفضوة يعملوا كذا تمام

    على فكره انا ماحكم على احد بس عندنا بجده شي يرفع الضغط

    << مدري عن اي منطقه تتكلم بس اتكلم عن جده

    وقسم بالله لو اني ؟؟؟؟

    بس نقوووووووووول لمليون مررررررررره

    الدنيا بخير بخير بخير<< تهدئ الاعصاب هذي العباره

    بسراحه موضوعك ميه ميه

    ننتظر البقيه

  26. watar Says:

    اماني..
    انا معاك في اللي بتقوليه بس مو صح اننا نقول عليهم متخلفين.. الله يهديهم و المفروض بتكون فيه حمله توعيه لهم
    ولا ايش رايك يا اماني؟

  27. gsoon Says:

    كلامك صحيح يا أخ وتر..
    والله العظيم أشكال تنرفز بالحيييييييييييييييييييل..

    ما نقدر نقول شئ هذي هي التربيه ..
    و الشئ الثاني الفضائيات ما قصرت أبد أبد…

    الله يهدينا جميع ..ويهدي قلوبهم يا رب..

  28. watar Says:

    gsoon..
    كلامك صحيح و شكرا لمرورك

  29. ابراهيم القحطاني Says:

    هذا من الهمبرجر يابو سالم …

    قبل يوم الشباب والبنات يآكلو مندي وبخاري وبرمه … كانو ناس يعتمد عليهم

    اما مع الهبمرجر .. خلاص العالم ماعاد تنفع بريال ..

    والتربيه يامحمد صارت معدومه … الا من رحم ربي … كل واحد يخاف يمنع عيالهم من شئ ويزعلو عليه ..

    ——————————

    برايفت : ” الشعر كدش يعني مكنوش و يمكن يكون ما غسل شعره
    من ٣ او ٤ شهور ”

    هذي غيره ولا ايش يابو سالم؟ ههههههههه

    والله لك وحشه

  30. نـــ/ــــص تفاحـــهـ Says:

    يوووووووووهـ الوآحد يشوف العجب العجآبـ لمآ يخرج من بيتووو

    آستآذي آبدعتـ في الوصف

    دمت كمآ تحب

  31. watar Says:

    ابراهيم القحطاني..
    اصلا معاد فيه شي اسمه تربيه يا برهوم

    نص تفاحه..
    شكرا لمرورك

  32. سيران/فلسطين Says:

    هاد الشي كمان عنا بغزة مو بس عندكم..يعني بتلاقي البنات على آخر موضة والشباب بيلحقوا وراهم.

    ويا عيني لما تنزل السوق بالليل شو الشباب بتلاقيهم متل النمل على البنات.. والبنات ما بيصدقوا واحد يحكيلهم كلمة.. ولا اللبس يا عيني على اللبس.. بتكون عنا البنت لابسة بنطلون بدو بتمزع عليها من كتر ما هو ضييييق على الآخير

    سلام يا مان:D

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s


%d مدونون معجبون بهذه: