Archive for 30 أغسطس, 2008

نقطه تحول في حياتي

أغسطس 30, 2008

كنت ناوي اتكلم في هالموضوع من زمااااان وما كنت متردد..بس كنت ناوي انتهي

من اشياء اجهزها ..  اول شي  احب اشكر صاحبي و رفيق الدرب  بندر رفه لاني

اعتبره السبب الرئيسي في هالموضوع وكمان ماشالله عيه ذكر نفس الموضوع في

اخر تدوينه له.

لمن خلصت الثانويه كان والدي الله يطول بعمره يتمنى اني اتخصص في اي من

اختصاصات الكمبيوتر..  و سافرت في  البدايه الى  الامارات و الى اماره الشارقه

بالتحديد  .. وبدات  في دراسه هندسه كمبيوتر ولكن من ثاني يوم قررت اني ما

اكمل في  هالتخصص  اللي بالنسبه لي  اعتبره  شي تعيس و خصوصا اني من

النوع اللي ما يحب يتعامل مع الاجهزه بشكل كبير.

و جلست  اشاور  نفسي على اختيار  التخصص و فعلا حولت على اداره الاعمال

و لكن بداخلي كنت  اتمنى اني الاقي  اي شي  متخصص بالرسم و الابداع اللي

اشوفه في بعض اللوحات او الاعلانات.

وطبعا  انتقلت  الى  الجامعه الامريكيه بدبي و  كملت  في  نفس التخصص في

الاداره وفي نفس الوقت بدات اتقرب من الشباب اللي في تخصص التصميم

و الحمدلله اني تعرفت هناك على العزيز بندر واللي فادني و حببني في هالمجال

بشكل كبير. ولمن رجعت على السعوديه اشتغلت في احد البنوك بوظيفه مرموقه

لمده ٤ سنوات وبعدها انتقلت الى شركه خاصه ولكن مازال حلم الابداع بداخلي

واني اتمنى اني اشتغل في شي احبه و اعشقه.

وكل مره  ازور فيها بندر  احاول اني احمس نفسي على اني اشتغل في حاجه

احبها .. و قبل ٣ اشهر بالتحديد حاولت  اني ادخل مجال  التصاميم و التنفيذ

وفي نفس الوقت التسويق  لها. والحمدلله بدات  في الحصول على عملاء كبار

و هذا  كله  طبعا كان كعمل  اضافي و لكنه  خاص فيني و  بمساعده بعض

الاصدقاء اللي اعتز فيهم وبصراحه ما اقدر اوصف  لكم  حجم  السعاده  في

انك بتشتغل في شي بتحبه وراح تحس بمتعه غير طبيعيه.

صحيح  اني  تآخرت في هذه الخطوه  ولكن الحمدلله  اني اتخذتها وهذا في

نظري افضل من اني ما اتخذها ابدا..

و انصحكم  لا  تشتغلوا الا في  حاجه  بتحبوها و لو كنتوا  ما تتقنوا عملها

اتعلموا  و  حاولوا فيها وابدآو في  عملها  ولا تترددوا.. كل شي صعب في

البدايه و لكن بعدين  راح  تمشي  الامور و راح تتسهل باذن  الله  تعالى

و احب اشكر الصديق و الاخ / بندر على التآثير فيني للتوجه الى النجاح

و انك خير مثال للصديق الصالح و الصحبه الصالحه.

و ان شاء الله راح يكون التاريخ الفعلي لبدايه العمل الرسمي

يوم الاحد

٢٠٠٨/٩/٧

بمشيئه الله تعالى و ياليت لا احد يسآل عن التاريخ لانه سر.

Dubai

أغسطس 27, 2008

مسخره

أغسطس 25, 2008

حكمه جديده اتبعتها

أغسطس 23, 2008

اذا تبغى تصير صقر.. لا تجلس وسط الدجاج

مستعدين لرمضان؟؟

أغسطس 20, 2008

رمضان باقي له اسبوع وكل عام وانتم بخير…. استعديتوا لرمضان ولا لسه؟؟

اللي اشوفه انه في ناس بدات تستعد ومن بدري بدري راحوا اشتروا اغراضهم

من السوبرماركتات قبل الزحمه و ناس تجهز جدول المسلسلات اللي راح تتفرج

عليها.. و برضوا فيه ناس كثيره الصيف حيستمر معاهم لبعد العيد لان اغبلهم

مسافرين في لندن و القاهره و بيروت و ناوين ان رمضان و العيد يقضوه في

الجو البارد… اللهم بلغنا رمضان مع اهلنا و احبابنا واصدقائنا يا حي يا قدير.

انتوا استعديتوا؟؟

حاله البنات

أغسطس 14, 2008

اللي جالس الاحظه في بناتنا العرب اللي باقابلهم في امور العمل

البنت الصغيره تسوي نفسها كبيره وبتفكر بنضج و حكمه

بعكس البنت او المرآه الكبيره اللي بتستخف وعلى بالها انها صغيره

و بتتصرف تصرفات لا تليق في سنها بالمره

وكلو كووووووووووووم لمن تشوف وحده وحشه،،،

يا سااااااااااااااااتر على تسويه في نفسها..

ماراح اقول مهرج عشان لا اظلم المهرج

تشوف وجهها كانها جايه حفله هالوين ( تنكريه)

والمصيبه انك بتشوف البنت الحلوه المحتشمه في قمه

الادب والتواضع ..

ايش الحكايه؟؟ فهموني

اشياء في خاطري اقولها ٥

أغسطس 8, 2008

بعض الاسواق  مخصصه للعوائل  ولكن رجل الامن (السيكيورتي ) مو مقصر

مانع اي شاب انه يدخل ولكن مافي مانع اذا جاء اي احد من اقاربه او الشباب

اللي في حارته انهم يدخلوا..ليش كذا؟

مصيبه لمن اي شاب يدخل اي ( نايت كلوب ) ويلقى ابوه جالس في زاويه مع

وحده شقره و الدنيا بخير.

ليش النيه السيئه دائما مقدمه على النيه الطيبه في اغلب الناس.؟

الى  متى  و  اغلب رجال  دوريات  المرور مايعرفوا  يخططوا الرسم الكروكي

للحادث؟ النتيجه في النهايه كل واحد يصلح سيارته.

اغلب  الزواجات صارت تنتهي  بالطلاق و اغلبها  للاسف  بسبب تدخل اهل

الطرفين و الزوجين مالهم اي دخل.

كبيره في حق الرجل ان زوجته تضربه ولكن الادهى انه يروح يشتكي عليها

في المحكمه..

اكثر شي يقهرني لمن تشوف ان الاب يساعد واحد من اولاده و يدعمه في اي

شي يبغاه . . وتلقاه مطنش و مهمل ولده الثاني

بحر

أغسطس 5, 2008

فينك يا بحر

نسيت ايام السهر

ولا احلو مع غيري السمر

من زماااان مالتقينا

و لا في امور الدنيا حكينا

ههههه  تذكر لمن هناك جرينا

و تشرق الشمس وما خلصنا سهر

فينك يا بحر

يقولوا عليك الناس غدار

و انتا الامان في ليل و نهار

وانتا اللي حافظ يا بحر كل الاسرار

فينك يا بحر

وطنك وش تقدر تعطيه

أغسطس 3, 2008

عناوين بايخه

أغسطس 2, 2008

لمن كل واحد فينا بيفتح ايميله اكيد راح يلاقي ايملات عناوينها

تجيب الهم و اسمحوا لي ان اقول انها تدل على سذاجه او

غباء الي رسلها لك. و المصيبه ان اغلبيتها عناوين مالها اي صله

بشي اسمه المنطق وراح اكتب امثله على هالعنوانين

الحق قبل لاحذف.. فنانه خليجيه مصوره بالفيديو في وضع مخل

مقطع لمطوع وهو يغتصب فتاه صغير

ارسل هالايميل لعشره اشخاص وسوف ترزق بمال وفير

امانه في رقبتك ترسل هالايميل ل خمسين شخص

شخص استهزآ بهذا الايميل فتحول الى قرد

صور بنت هيفاء وهبي

صور زفاف الامير او الفنان الفلاني

يا عالم استحوا .. بالله هذه عناوين الواحد يصدقها او

يؤمن فيها.. وكمان ايش دخلكم بصور الناس و اولادهم

و اقاربهم و اللي معاهم.. و بطلوا لقافه.. هذي عناوين

المفروض اللي يفتحها و يقراها يستحي على وجهه و اما

الرايق اللي عاده يرسلها للناس اعتقد انه هو المفروض

اللي يتحول و يصير قرد.

يا عالم ورب العباد استحوا .. ترى والله ضحكتوا الناس

علينا .. يعني لازم نوريهم ان عندنا شباب تافهين و تفكيرهم

زي كدا؟؟

المهم ركزوا في اللي جاي وشوفوا مستقبلكم اللي اتوقع انه

يكون اسود طول ما انتوا ماشين ورى عناوين زي هادي

و السلام ختام