Archive for 25 سبتمبر, 2008

الكل يفتي ٢

سبتمبر 25, 2008

و مازال كل واحد يفتي على كيفه و اخرهم الشيخ محمد المنجد

و يدخل عالم الشهره من اوسع الابواب وكلنا شفنا الفتوى العجيبه

بقتل ميكي ماوس..

بالله وصلت درجه الفضاوه الى انه يحكم و يفتي في هذي الاشياء

و المصيبه انه انكر هالشي في موقع العربيه و كآننا ما شفنا شي

الادب و الاصول

سبتمبر 25, 2008

لو سمحت.. اذا ممكن.. اتفضل.. شكرا .. اسف

في هذي الايام  صرت  احس ان  هذي المصطلحات  او الكلمات اللي

تدل  على الذوق  و الادب  في الاختفاء  من  القاموس وصاروا اغلب

الناس بلا  اي ذوق او احترام و قليل جدا اللي بيستخدم المصطلحات

المعروفه و الخاصه  ببعض المجامله و الادب  ،،  و حتى الشباب في

هذي الايام صار قليل منهم اللي بيعرف الاصول   و العيب و احترام

الكبير في السن و من  الطبيعي اننا  بنشوف شاب او شابه بيرفعوا

اصواتهم على اخوانهم الكبار و حتى على ابوهم و امهم  .. لو نرجع

لفتره ما قبل ٢٠ سنه تقريبا اتذكر اننا كنا  نخاف  من  اي شخص

كبير في السن و  نحترمه  زي ما نحترم ابائنا  و اعمامنا  و نخاف

نسوي اي شي غلط قدام الكبار. بعكس الايام هادي و من  الطبيعي

جدا انك بتشوف اي مراهق  بيدخن او يشرب الشيشه   او  المعسل

قدام اخوه الكبير و طبيعي كمان انك بتشوف البنت  تشرب  معسل

قدام امها  او ابوها .. و اشياء  غريبه  صرنا  نشوفها و  ياما  راح

نشوف و لكن هذا  الشي جدا خطير والله يستر على الاجيال الجايه

ايش  راح  تسوي كمان والسبب في هذا هل هو بسبب دلع الاهالي

لعيالهم او الاستهتار اللي بيزيد في طبيعه الشباب و البنات عندنا.

يعني بالله فين راح نوصل بقله الادب هذي؟؟

لا اله الا الله.. مشاري العفاسي

سبتمبر 18, 2008

من اروع الاناشيد للشيخ مشاري العفاسي وهي من البومه الاخير ، ذكريات

عبدالله دبلول

سبتمبر 17, 2008

الشاعر عبدالله دبلول.. من شعراء مكه المكرمه

وعن نفسي يعجبني كثير و اليوم اخترت لكم

هذي القصيده بعنوان نسمه حلوه.

نسمة حلوة جات في بالي

يا زقاق بيتنا القديم

نعنشت بستان خيالي

بريحة النبق و النيم

لما كنا صغار و دقة

و كانت حالتنا طينة

و نحن نلعب في الأزقة

و لا أحد يسأل علينا

هادا قرصتو بقه

و عمال تهرشلو أمينة

و هادا في جيبوا بقعة زرقة

واصلة لحد الفنيلة

و هادا ماسك أم طقة

يسئلها نروح المدينة

و دا ماشي و في توبه قلقه

و كائنوا كان جالس في كينة

و دا يلحس حمر في ورقة

و البحر خلا طحينة

و دا يلف في مرقة

و فمه شغال زي الماكينة

و دا شايل على راسه شقة

يخبزها لخالة حسينة

و هادا متشعبط في سقا

سألوا متى رايح تجينا

و دا عمال يحنجل على عمره ابن الذينه

قال بيلعبلي بربر تقول في رجلو غرغرينة

و عيال عمال تزعق

يا مطرة حطي علينا

و حمرة من الروشان تبربر

انكتم عساك القرينة

و دول في لعبة أودام

و دول في استوت المقادم

و دا شبر ماد البراطم

و مسوي شوطة و ازعرينه

و دول في طبيش الأعمى

و هادا يجري ورا الكلاب

و دا في البازار يستحما

حتى ما تشوف امه الهباب

و دا يبغى يقلبها ظلمة

يحرش مين يكش التراب

و دا مسوي صياح و رجة

و دا كب دقيق حجة

و هادا بيسبسب في كنجة

مع أنه زي الغراب

و هادا بيلعب برجون

و هادا جاب بالكورة قول

و هادا خوف من العيون

لبسوه أهل حجاب

و دا ماسكله جنط

يجرى ورا بحديدة

و عمال ينقز و ينط

و شبب و فردة و فريدة

و دول في طيري طار

و دول ينطوا فوق أشبار

و دا راكب فوق جريدة

قال مسويها حمار

و دا بيطقطق أقر

و هادا بياكول لنقطة

و هادا بيغمس في شرش

و الحكاية ملخبطة

و هادا من قوة بطر يبغى ياكل لغمطة

و شيبة زورو انشقر

سيب يا واد الشعبطة

كنت تشوف الحكاوي

و اللي يمشوي السقاوي

ياكل كل يوم علقة

عشان يطلع شقاوي

اشتقت يا زقاقنا لجارك

لكل مين دعساك و زارك

اشتقت للوزك الهندي

اتشعبطلو أشجارك

و هادي نسمة خفيفة

من حياة حلوة و لطيفة

صورة من الماضي الكريم

في زقاق بيتنا القديم

الكل يفتي

سبتمبر 16, 2008

اذا كنت جالس في مكان و معاك مجموعه من الشباب وسآلت عن

شغله في الهندسه ، ماراح يجاوب عليك الا المهندس اذا كان موجود

معاكم.. واذا حبيت تسآل عن اي موضوع محد راح يجاوبك الا اللي

فاهم فيه.. ولكن آسآل عن اي شي في الدين .. صدقني الكل وقتها

راح يصير شيخ و راح تسمع فتاوي مالها اول ولا اخر.. ليش كذا؟؟

شكرا موبايلي

سبتمبر 14, 2008

شكرا للشباب الموجودين في فرع شركه موبايلي في مركز الراشد على

المعامله و الخدمه الطيبه اللي قدموها لي… عندي رقم مميز بس لي

حوالي اكثر من ٥ شهور ما استعملته ولا كان عليه اي فاتوره. المهم

هذا الرقم انفصل من الخدمه و تم الغاؤه.. ولما زرت فرع الشركه

بلغت الموظف باللي حصل و بعد ما ادخل المعلومات في الجهاز قال

لي ترى عليك مبالغ بقيمه ٦٧ ريال بس وان شاء الله لمن تسددها

يرجع الخط بس بعد اسبوع و بعد ما سددت قال لي الموظف ان

السيستم عطلان و ما يقدر يرسل طلب اعاده الخط الان وطلب

مني اي رقم جوال معاي عشان راح يكلمني.. وطبعا لمن قال لي

هالكلام قلت هذي احلى تصريفه.. المهم اعطيته رقم جوالي اللي

معي و بعد حوالي ساعه او اقل تفاجآت بمكالمه من موظف موبايلي

يقول لي فيه ان السيستم اشتغل و تم ارسال طلبي و ان شاء الله

راح يشتغل الرقم بعد ٦ ايام..

من جد خدمه زي الناس و ياليت ناس و ناس يعرفوا كيف يخدموا

مشتركينهم مو لمن تتصل يقول لك لازم تتصل من اي رقم باسمك.

One Happy Nation

سبتمبر 7, 2008

يا هلا بكم

www.1happynation.com

الله يهديه

سبتمبر 2, 2008

الموبايل الخاص فيني يرن.. نغمه ل اليسا..

انا: الو

الطرف الثاني: السلام عليكم

انا: وعليكم السلام

الطرف الثاني: كيف حالك يا ابو حميد وايش اخبارك؟

انا : الحمد لله.. مين؟

الطرف الثاني : افاااا .. ما عرفت صوتي؟

انا : لا والله ماعرف صوتك..

الطرف الثاني: معاك ابو فلان.

انا: يا هلا والله

الطرف الثاني: والله يا ابو حميد انا عارف ان علاقاتك كثيره وانت ما تقصر مع الناس

و بصراحه ابي منك خدمه بسيطه.

انا: اتفضل

الطرف الثاني: الشباب كلموني انك تعرف واحد في مصلحه الزكاه.

انا : طيب المطلوب.

الطرف الثاني : بصراحه عندي سجل تجاري ولي ٧ سنوات ما جددته والحين طالبين

مني مبلغ كثير وبصراحه ياريت لو تكلم خويك عشان يعمل لي تخفيض

في مبلغ الزكاه.

انا : معليش اسمح لي .. ترى شغل الواسطات من زمان مبطلها.. وبعدين يا اخي ادفع

هذي زكااااااااه.. يعني شي حق ربنا و تبغى تنصب..

الطرف الثاني: بس يا اخوي المبلغ كبير..

انا : طيب ادفعه .. يعني هم طلبوا مبلغ زياه عن الزكاه الفعليه اللي لك؟

الطرف الثاني : الحقيقه لا

انا : اسمعني.. تعرف مكتب مصلحه الزكاه فين؟

الطرف الثاني: ايه

انا : طيب روح امسك سرى و ادفع الي عليك

الطرف الثاني : افاااا .. يعني تردني..

انا : ايوا اردك و عشره زيك ولو سمحت فارقني لاني مشغول.. سلام.

هذي مكالمه بيني و بين واحد اعرفه ولكن من زماااان ما شفته ولا سمعت صوته

وربنا منعم عليه وكل سنه بسياره جديده وماشالله تلاقيه  مو مقصر  على

البنات في المراقص و الكباريهات.. واكثر واحد ينقط فلوس عليهم و للامانه

الرجل هذا ماله في الشرب.. ولكن يشوف الزكاه كثيره ومبلغها كبير

الله يهديه.