عبدالله دبلول

الشاعر عبدالله دبلول.. من شعراء مكه المكرمه

وعن نفسي يعجبني كثير و اليوم اخترت لكم

هذي القصيده بعنوان نسمه حلوه.

نسمة حلوة جات في بالي

يا زقاق بيتنا القديم

نعنشت بستان خيالي

بريحة النبق و النيم

لما كنا صغار و دقة

و كانت حالتنا طينة

و نحن نلعب في الأزقة

و لا أحد يسأل علينا

هادا قرصتو بقه

و عمال تهرشلو أمينة

و هادا في جيبوا بقعة زرقة

واصلة لحد الفنيلة

و هادا ماسك أم طقة

يسئلها نروح المدينة

و دا ماشي و في توبه قلقه

و كائنوا كان جالس في كينة

و دا يلحس حمر في ورقة

و البحر خلا طحينة

و دا يلف في مرقة

و فمه شغال زي الماكينة

و دا شايل على راسه شقة

يخبزها لخالة حسينة

و هادا متشعبط في سقا

سألوا متى رايح تجينا

و دا عمال يحنجل على عمره ابن الذينه

قال بيلعبلي بربر تقول في رجلو غرغرينة

و عيال عمال تزعق

يا مطرة حطي علينا

و حمرة من الروشان تبربر

انكتم عساك القرينة

و دول في لعبة أودام

و دول في استوت المقادم

و دا شبر ماد البراطم

و مسوي شوطة و ازعرينه

و دول في طبيش الأعمى

و هادا يجري ورا الكلاب

و دا في البازار يستحما

حتى ما تشوف امه الهباب

و دا يبغى يقلبها ظلمة

يحرش مين يكش التراب

و دا مسوي صياح و رجة

و دا كب دقيق حجة

و هادا بيسبسب في كنجة

مع أنه زي الغراب

و هادا بيلعب برجون

و هادا جاب بالكورة قول

و هادا خوف من العيون

لبسوه أهل حجاب

و دا ماسكله جنط

يجرى ورا بحديدة

و عمال ينقز و ينط

و شبب و فردة و فريدة

و دول في طيري طار

و دول ينطوا فوق أشبار

و دا راكب فوق جريدة

قال مسويها حمار

و دا بيطقطق أقر

و هادا بياكول لنقطة

و هادا بيغمس في شرش

و الحكاية ملخبطة

و هادا من قوة بطر يبغى ياكل لغمطة

و شيبة زورو انشقر

سيب يا واد الشعبطة

كنت تشوف الحكاوي

و اللي يمشوي السقاوي

ياكل كل يوم علقة

عشان يطلع شقاوي

اشتقت يا زقاقنا لجارك

لكل مين دعساك و زارك

اشتقت للوزك الهندي

اتشعبطلو أشجارك

و هادي نسمة خفيفة

من حياة حلوة و لطيفة

صورة من الماضي الكريم

في زقاق بيتنا القديم

Advertisements

10 تعليقات to “عبدالله دبلول”

  1. ثامر الطويرقي Says:

    ممكن نسميها (خواطر مكاوي) 🙂

  2. لؤلؤة Says:

    قصيدة رووووووووووعة
    مررررررررة أحب أسمعها..

    بس فيها شوية أغلاط إملائية ياريت تعدلها 🙂 عشان تطلع أحلى
    وتحية للشاعر عبدالله دبلول

  3. بشوره Says:

    عاش المكاوي 😀

    حلوة بس …….

    من زمان عن مدونتك …. تحياتي

  4. watar Says:

    ثامر الطويرقي..
    ياراجل اتق الله ..مغص ايش اللي تقول عنه..؟؟
    صحيح ممكن نسميها خواطر مكاوي في العصر الحديث..يشرفني مرورك

    لؤلؤه..
    عدلناها يا ستي.. وياهلا بك

    بشوره..
    يشرفني تواجدك يا بشوره يا قاطعه ويا هلا بك

  5. العائِشَة Says:

    اهل مَكه
    تَكفي لَهجتهُم عشان تِخلي اي سالفه جَميله
    انبسط لو قعدت مع “حجازيين” امسكهم دفة الحديث واجلس ,, ووو استمتع

    رائِعه بِغض النَظر عَن كونها شِعرا او لا
    مُمتِعه جِدا 🙂

  6. watar Says:

    العائشه..
    شكرا لمرورك اختي

  7. عبدالله دبلول Says:

    السلام عليكم و رحمة الله و بركاته
    أولاً أشكر صاحب الموضوع و إهتمامه الكريم
    فلقد وصلني عن طريق الايميل بواسطة صديق
    حضرت لأشارك بكلمة شكر و إمتنان
    محبكم
    عبدالله دبلول
    لمن أحب الإستماع فليتفضل مشكوراً
    http://banatona.com/vb

  8. watar Says:

    الاستاذ اكبير عبدالله دبلول..
    شرفني تواجدك

  9. مصطفى خليل Says:

    للإستماع لتراثيات الشاعر الحجازى الأصيل بجودة صوت ممتازة
    على فليفضل هنا
    http://banatona.com/vb

  10. watar Says:

    مصطفى خليل..
    شكرا لك وتمنياتي لك بالتوفيق

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s


%d مدونون معجبون بهذه: