Archive for 30 أكتوبر, 2008

علي المفيدي …في رحمه الله

أكتوبر 30, 2008

انتقل الى رحمه الله سبحانه و تعالى الفنان على المفيدي

هذا الانسان الذي طالما اضحكنا في مسلسلاته و مسرحياته

اللهم ارحمه برحمتك يا ارحم الراحمين .. اللهم نقه من الذنوب

و الخطايا كما ينقى الثوب الابيض من الدنس ، اللهم اجعل

قبره روضه من رياض الجنة ، يارب يارحمن ياغفار ابدله

بدار خير من داره و اجعله في منزله الطيبين يا ارحم الراحمين

هل سيعود قريبا؟

أكتوبر 24, 2008

هل سيعود جراندايزر ليحكم العالم و يعم السلام؟؟

مستانسين / شر النفوس

أكتوبر 20, 2008

مبروك  للفنان الكويتي المبدع نايف الراشد ولكل طاقم مسلسل شر النفوس حصولهم

على لقب افضل مسلسل عرض في شهر رمضان المبارك . مسلسل شر النفوس عرض

في  قناه MBC و تحكي  قصته عن انسان ملتزم يقوم احد رفقاء السوء و اهله بعمل

سحر له حتى يسرقوه ….و حتى نهايه المسلسل كانت غير متوقعه بحيث ان اكر الناس

توقعوا ان يتم القبض  على  عائله ام محمود  التي قامت  بالسحر  ولكن لا يتم القبض

عليهم و  القصد من ذلك  انه يوضح للناس  ان شر  النفوس  باقي  في بعض  الناس

اصحاب القلوب السوداء و ان الخير موجود دائما لمحاربته.

ذبحني السهر

أكتوبر 17, 2008

في ايام الدوام قبل رمضان كنت انام الساعه ٢ الفجر والحمدلله اقوم اصلي

الفجر وارجع ثاني ولمن جا رمضان كنت اصلي الفجر و  انام.. المشكله لمن جا

العيد..من جد جا العيد و صرت انام الساعه ٧ الصباح  .. وجا الدوام و نومي

مو راضي يتعدل.

اتقلب يمين شمال .. اغير المخده ..   نفس الشي. اول  يوم دوام رحت مواصل

و رجعت مو شايف شي قدامي وكنت عامل حسابي  اني راح انام الساعه ١٠

عشان كل شي يتعدل،المهم الساعه ٩ونص جاني نشاط غير طبيعي وما ادري

من فين. و ابشركم نمت الساعه  ٤ الفجر… والى اليوم  وانا في نفس المعاناه

لدرجه اني تعمدت  اني اروح للنادي بالليل عشان اجي تعبان وانام..والمصيبه

اني اجي تعبان ولا اقدر انام.

وكله كوم و الافكار الرهيبه اللي تجي وانا احاول انام..شي في العمل و اشياء

ناوي اني اسويها من زمان و ناسيها..اليوم  لو ما ظبط  ناوي اخد منوم بس

الخوف اني ما اقدر اصحى  بكره بدري من اثار المنوم …او فيه حل  نهائي و

لكنه مدمر…هو اني اتعشى رز و هذا اللي انا موقف من اكله اكثر من شهرين

و اختمها بلبن. ايش رايكم؟اتوقع ان برهوم موافق

ذ/ رشاد فقيها

أكتوبر 15, 2008

الاستاذ رشاد فقيها..

شاب من الشباب اللي بنفتخر فيهم

انسان قدير ومن افضل الشخصيات اللي تشرفت و التقيت فيهم

حضرت له اكثر من كورس و اخرها دوره بابتسامه خلي روحك حلوه

في نادي كاي الرياضي بجده.

عن نفسي استفدت اشياء كثيرة منه و اتمنى انكم ما تترددوا و تروحوا

تحضروا الدورات اللي بيقدمها الاستاذ رشاد فقيها

مضاربه بنات

أكتوبر 13, 2008

اليوم و انا واقف منتظر وصول المصعد في احد الابراج في الخبر ..سمعت صراخ

بنات  و  كانهم  بيتخاصموا  او  شي زي كده .. المهم فجآه اتفتح احد الابواب و

يخرجوا بنتين  بسرعة و متماسكين  كل وحدة شادة شعر الثانية و وراهم الظاهر

زميلاتهم في العمل. المهم انا ذهلت وما عرفت ايش اسوي و ثواني المصعد و صل

و مع الصوت الرجال اللي في المصعد كلهم خرجوا بسبب الصوت و الصراخ اللي

كان ….طبعا  البنات حاولوا يفكوهم  بس ما قدروا  و الرجال يتكلموا وبرضوا ما

قدروا و احلى شي ما ادري ايش اللي جاب السكيورتي كمان.. و انا عارف ان في

رجال كان ودهم يتدخلوا و يفارعوا. المهم فجآه جات وحده بنت و شكلها مديرتهم

او شي .. المهم سحبت كل بنت في جهه و اعطت كل وحده كف على كيف كيفكم..

وفجآه صرخت في الرجال كلهم.. انتوا ايش اللي موقفكم هنا؟؟

طبعا لاول مرة اشوف شلة رجال و كبار وانا معاهم.. نخاف من بنت.. وعلى طول

مجموعة هربت و نزلوا من الدرج و ثانيين وقفوا معاي واستمرينا واقفين منتظرين

المصعد و حذر  من اي هجوم  مفاجيء.. انا اللي اعرفه ان يصير بين البنات كلام

و صراخ ولكن ضرب زي اللي شفته ابدا م اشفت ولا اعتقد اني راح اشوف..انتوا

شفتوا شي زي كده؟؟

مستشفى الدكتور سليمان فقيه

أكتوبر 10, 2008

مستشفى  فقيه الاسم  المختصر لها كما  هو معروف عند اهل جده عروس

البحر الاحمر وفي نفس الوقت من الممكن اننا  نسميها مركز  فقيه التجاري

نسبه  الى بعدها  كل  البعد عن  المبدآ الانساني الخاص بالطب وجعل اول

اهدافها  الربح  ثم الربح ثم الربح  اما عن المريض مايهم  و اهم شي اللي

في جيبه..

كانت  لي تجربه  خاصه الاسبوع  الماضي في اول ايام عيد الفطر ..دخلت

اختي  قسم الطواريء و كانت تشتكي من الانفلونزا الحاده..واحنا في قسم

الطوارىء شفت العجب  فوضى غير طبيعيه..الملف يستغرق اكثر من خمس

و اربعين دقيقه للوصول الي قسم الطواريء .. مشاده كلاميه بين الاطباء..

ملابس الدكتور (البالطو الابيض الخاص به) في قمه القذاره.. وبعد هذا كله

امر الدكتور بضروره التنويم.. وصلنا الى الغرفه و بعد ساعتين تقريبا حضر

دكتور قسم  الانف و الاذن  و الحنجره  و اخبرنا  بضروره  عمل عمليه في

الانف بسبب  اعوجاج بسيط و يقول انه هو سبب الانفلونزا الحاده اللي تمر

فيها..

وطبعا رفضنا.. و بعد حوالي ٤ ساعات جا دكتور ثاني من قسم الباطنيه و

معاه  دكتور  جراح و يقولوا  ان التحاليل مبينه معاهم ان الزائده هي سبب

هذا التعب وطردناهم كمان من الغرفه.. بالله هذي مستشفى ولا سوق سمك؟؟

هذا غير الادويه الغلط اللي تم اعطائها لاختي وتسببت في فتور غير طبيعي..

انا ابغى  اسآل سؤال واحد .. كيف  هذه المستشفى اخذت جوائز عالميه؟؟ هل

اشتروها؟؟ او اخذوها بواسطه؟؟  و الحمدلله  اننا نقلناها  لمستشفى  ثانيه و

الحمدلله كل شي انتهى على خير و في اقل من يوم واحد..

فين  وزاره  الصحه نايمه وما تعرف ايش  يصير  في المستشفيات؟؟ و طبعا

حاولت  اني  اوصل  للدكتور مازن فقيه  و  بائت كل المحاولات  بالفشل.. و

الحمدلله اني ما قابلته لاني اتوقع انه ماراح يصير  شي  حتى  لو   كلمته ..

على  العموم  انا كتبت  الموضوع هنا في المدونه عشان افضفض من الاشياء

اللي شفتها في سوق فقيه التجاري..عفوا اقصد مستشفى الدكتور سليمان فقيه.

كل عام وانت بخير

أكتوبر 1, 2008

تقبل الله مننا ومنكم صالح الاعمال

و

عساكم من عواده