Archive for the ‘احساسي الصادق’ Category

الدكتور محمد عبده يماني .. في ذمه الله

نوفمبر 14, 2010

رحلت عنا .. في غفلة

كلما اذكرك .. اراك في مخيلتي مبتسما كعادتك

بسيطا .. محبا لجميع الناس .. مخلصا لدينك و وطنك

رحلت عنا .. ولم نخبرك كم نحبك يا دكتور ..

نسآل الله ان يكرمك في دار الاخرة و ان يرحمك برحمته

الواسعه التي كنت دائما تحكينا عنها..

رحمه الله عليك

اللقافة

يونيو 27, 2010

انت ليش ما تغير سيارتك؟؟

غريبه ليش ما سافرتوا في الصيف؟؟

عيالك ليش ما تنقلهم مدرسة غير اللي هم فيها؟؟

مليون سؤال و سؤال الناس يوجهوها لبعض و السبب معروف وهو حب اللقافة.

اللقافة هي حب التدخل و معرفة كل الاشياء الخاصة بآي شخص او محـاوله

التدخل في شئون الاخرين. اليـن متى و العالم تتدخـل في امـور الناس و تبدي

رآيهـم حتـى لو محد طلب منهم ابداء رآيهـم ؟؟ هـل هـو مرض او داء ممـكن

نلاقي له اي دواء .. و لا هو من ضمن الصفات الوراثية اللي نتوارثها من ابائنا و

اجدادنا زي الشكل و الاخلاق؟؟

طيب اهم سؤال ليش احنا العرب مشهورين باللقافة بينما الاجانب كل واحد في حاله؟؟

افيدوني آثابكم الله

سيول جدة

ديسمبر 4, 2009

كان يوم الاربعاء ٢٥ /١١ من  اسوآ الايام اللي مرت على جدة و على وطننا الحبيب

الامطار كانت طبيعيه ولكن اللي ماكان طبيعي هو اللعـب اللي حصـل  في  شبكـات

التصريف والنصب اللي حاصل من زمان وجائت هذه الامطار و فضحت كل شيء.

ناس غرقت و ماتت .. الشوارع غرقت ..  السيارات فوق بعض و كل شخص شاف

مناظر يمكن محد شافها الا في الافلام السينمائية.

بكت  جدة و  بكت قلوبنا  واحنا نشوف  جدة بتغرق والناس  غرقوا معاها  .. و كل

مسئول نايم في العسل ولمن صحوا كل واحد صار يلقي اللوم على الثاني.

الشباب  و البنـات في  جدة ماقصروا وصار تجمعهم كل يوم في مركز المعارض و

يجمعوا  التبرعات العينية عشان  يوزعوها  على الناس ا لمنكوبة و  رغم التـعب  اللي

هـم فيه تيخلوا يجـوا ناس  بدال ما يسـاعدوهم و هـم في  امس الحاجة الى اي يد

تمـتد عشـان تساعد.. نلاقي هذه الفـئه اللي محسـوبة على الدين  بتـحاول  تخرب

علـى الشبـاب و البنـات في مساعـدتهم للناس..  هل هذا  من الدين؟؟ انك تلاقـي

ناس فـي امـس الحـاجة للمساعدة و تـروح تخرب علـيـهم و تشـوش علـيهم  فـي

عملهم؟؟ مصـيبه ثـانيه اننا  بنـشوف ناس بدال ما تـدعي  الله انه  يخفـف  علـى

المنـكوبـين و يصـبروا اهل المتـوفين بنلاقيـهم يقـولوا يسـتاهلوا اهل  جـدة  لانـهم

اهـل الذنـوب و الـضلال .. لاحـول  ولا قوه الا بالـله ..   بس اعـرف ايـش  اللـي

قاهـرهم في اهـل جـدة؟؟ اهـل جدة اهل  خير  و محبـة و عـمرهم ما كرهوا احد

وفي النهايه يجوا المتخلفين يقولوا هذا الكلام؟؟

اللهـم  ارحـمنا  برحـمتك  و اسقـنا سقـيا  رحـمة  لا سـقيا عـذاب و اصـرف عـنا

الوباء و ارحمنا برحمتك يا ارحم الراحمين.

رمضان مر بسرعه

سبتمبر 18, 2009

السنة هادي شهر رمضان المبارك مر علينا بشكل جدا سريع

يادوب امس  كنا نبارك للاهل و الحبايب قدوم الشهر و اليوم

قدنا في نهايته…

نسـآل الله عز و جـل ان رمضان  ينعاد علينا اعواما عديدة و

سنين مديدة كلها خير و بركة.

خلاص باقي كم يوم على العيد..و كل سنه وانتوا طيبين  من

بدري وقبل الزحمة وربي انشالله يتقبل صيامكم و قيامكم  و

صالح  الاعمال و يبارك لكـم في الـعيد و ربي يجعل ايامكم و

ايامنا كلها اعياد و ياحظ  الطلاب اللي  اتمددت اجازتهم بس

ياريت بس  يستـفيدوا في الايام الباقية من الاجازه  و يبطلوا

كتر النـوم و اللفلفه في الاسـواق ورى  البنات و الجـلسة  في

القهاوي و يوشوفوا حاجة تفيدهم.

والبنات كمان ياريت يبطلوا فلانة قالت و فلانة سوت،خلاص

ما تعبتوا من الرغي و الحش.. روقوا شويه.

و السلام ختام.

رد على احد التعليقات

سبتمبر 11, 2009

اليوم و انا اتابع الردود  في المدونه في موضوع (الين

متى ) لقيت احد الردود و بصراحه انصدمت في طريقة

التعليق  و  الاسلوب  في الكتابه و ياليت  بس   تقرآوا

التعليق اللي تركه الاخ او الاخت و اعرف رآيكم.

التعليق الذي كتبه الزائر :

والله العظيم

موضوع سخيف جدا .. !!

نعم سخيف .. !!

تركت كل المواضيع ورحت للصرافة والمعصوب والمطعم الايطالي ؟!

طيب اتكلم على طيحني .. الكدش .. الترقيم .. المصخره .. السربته ..

الشرب .. الرقص .. !!

جاي تتكلم على البنات ماسكين كلابهم ولا على الحريم يقولو عيب

عشان زوجها لما يمسك يدها !!

هذا تفكيركم يا عرب وربي مستحيل تتقدمو ..

تفكيركم في الحظيظ ومستحيل تتطورو ..

فكر فكر فكر .. شوف موضوع يشفعلك يوم القيامة .. يوقف معاك ..

اتكلم عن الصلاة عن المصخره اللي حاصله .. مو تتكلم عن الممشى والمعصوب ..

وربي شي يقهر .. لا ومتعب نفسك كمان ..

يمين بالله عمركم مارح تتطورو ..

آسف على الكلمة اللي رح اقولها

لكن ” ماعندك شي ” وصدقني ولا كأنك سويت حاجة ..

وعلى فكرة وربي لا اعرفك ولا تعرفني بس شدني هذا الموضوع وياريتني

ماقريته .. عفوا رح اقفل صفحتك لاني توقعت اشوف شي يفيدني ..

انتهى.

واضح  من الرد  ان  الشخص  اللي كتب  التعليق انسان يمكن

يكون متشدد او معقد بعض الشيء  او من انواع  البشر  اللي

مايعجبها اي شي …. اخي الكريم  اول  شي احب اوضحه لك

اني كشخص افتخر  بكوني انسان عربي مسلم واذا انك شفت

ان الموضوع  سخيف  فصدقني  ان  كل  شخص  يرى  الناس

بعين طبعه  و  معناه  ان  الانسان  السخيف   او  القبيح   راح

يشوف  كل  شي  سخيف و قبيح… و بالنسبه للمواضيع ترى

اتكلمت عن  مواضيع  كثيره و منوعه و احاول  قد ما اقدر اني

انوع  في المـواضيع  اللي اقـوم باختيارها  للزوار  الكرام  في

مدونتي المتواضعه و البسيطه . واما عن مواضيع  الكدش  و

التـرقيم و طـيحني  و الشرب و الـرقص  فهذي  مواضيع   قام

الكثيرين من الاخوه و الاخوات الكرام في مناقشتها قبلي و قد

تكلمت عنها قبل فترة.

وعلى تفكيرنا كعرب المفروض انك على الاقل تفتخر ولو بشي

بسيط من عروبتك وانا اتكلمت عن شي اشوفه حاصل امامي

فـي المجتمع  العربي  اللي انا عايش  فيه و اذا كنت انت في

الحضيض و تفكيرك في الحضيض اتمنى ان لاتشملنا  معك

في تفكيرك .

و مره ثانيه احـمـد الله  انني  انسـان مسلـم  عربي متبع  لسنه

نبينا محمد صلى الله عليه و سلم و اسآل الله ان يجعل رسوله

الكريم شفيعا لنا يوم القيامه.

و انا مستغرب ان الموضوع اللي كتبته قهرك زي ما اتفضلت و

كتبت في تعليقك ، واذا كان قهرك فعلا اتمنى من الله عز و جل

ان يشفيك من القهر ا و الوسواس القهري الذي فيك و باذن الله

سبحانه و تعالى راح  تتـطور امـتنا و تنهض على  يد  ابنائها

المخلصين المستوعبين لكل شيء من حولهم و اذا انا ماعندي

شي في نظرك  اتمنى انك  تروح  تشوف شي ينفعك و يشغلك

عن مهاجمه الناس و احب اطمنك  اني ان  شاء الله مستمر في

الكتابة و انا اسـف اذا قـسيت عليك في ردي واتـمنى انك تكون

انسان تفـكيرك منطـقي و لا تشغل نفسك في اتبـاع الموضه و

معانده الشباب واذا ما عجبتك المدونه ياليت تعتبرها مثل اي

قناه تلفزيونيه ما تعجبك وبامكانك تغير و تشوف قناه ثانيه

و السلام عليكم و رحمة الله.

كل عام وانتم بخير

أغسطس 22, 2009

Ramadan Kareem

اغنيه الله احد ( الله معك يابلادي )

أغسطس 10, 2009

من احب الاغاني لقلبي .. صحيح اغنيه قديمة

لبلدنا الحبيبة ولكن مافي زيها

اشياء في خاطري اقولها ٧

أغسطس 7, 2009

قلة الذوق و من العقوق لمن تشوف شاب طول بعرض ماشي ز ي الاهبل

وتلاقي آبوه جمبه يشيل مليون كيس او غرض في يده و الشاب بيتفرج.

..

مصيبة لمن البنت بتكون مصاحبة شاب و امها عارفه بس ساكتة و تعمل

نفسها ما تعرف.

..

ليش البنات صاروا اشطر من الشباب و بكتيييييييييييير ؟؟

..

استغرب لمن اشوف شباب و المسجد جمبهم والناس بيصلوا وهم جالسين

بيدخنوا ويشربوا شاي.

..

على سيرة التدخين ربنا انشالله يوفق كل واحد ناوي يبطل دخان و

رمضان ياشباب و همتكم و خلوا السجاير او الزقاير على قولة ناس وناس

..

فيه ناس لها اطباع غريبة في الاكل تخيلوا واحد من الشباب اطباعه مرررة

غريبة في الاكل…. تصدقوا انو ياكل الهمبرجر وبدال الكاتشب يحب يحط

مربى بالبرتقال.

الاقنعة

يونيو 7, 2009

العفويه في التعامل اصبحت شي من الماضي او من الاساطير …. اليوم

صاروا الناس لابسين اقنعة في و جيههم و بيظهروا و يتعاملوا مع الناس

بعكس ما يخبوه في داخلهم. وقليل اللي تشوفهم يقول لك ترى  انا اللي

في قلبي على لساني.

الناس اتغيرت و القلوب اتغيرت و الاخلاق كمان اتغيرت و بعد كده يجوا

يقولوا و الله الزمن اتغير،،،، الزمن ما اتغير ابدااااا،،، الناس هم اللي

غيروا نفسهم بنفسهم.

زمان الواحد كان بيتعامل مع الناس بكل عفويه و اريحيه،،،، الحاره

واهل الحاره كانوا زي العيله الوحدة ، وكان بينهم الاحترام و  الثقه

اللي بتخلي الكل مطمن. وانا عارف دحين و انتوا تقرآوا الكلام دا

تقولوا الله على زمان وايام زمان

sorry

أبريل 24, 2009

To all my Visitors

i am sorry because i was busy

with a lot of marketing campaigns

i promise you.. i will be with you

during this week

Thank you

MOHAMMED BIN SALEM

الين متى

مارس 25, 2009

الفقره هدي كان اسمها الى متى بس قلت لازم ارجع و اسميها بلهجتنا

الحجازية الحلوه ويعني حيصير اسمها الين متى؟؟ يلا نبدآ و بسم الله

الين متى  وبعض الحريم لمن ازواجهم  يبغوا يمسكوا يدهم في الشارع

يقولوا عيب؟

الين متى وبعض الرجال يسوي انه جنتل مع الناس الغرباء ومع اقاربه

تعامله زي الجزمه؟؟

البطاقة اللي  تسحب فيها فلوس من الصراف اللي مالي كل  الشوارع

اسمها بطاقة الصرف او السحب الالي.. بس الين متى كثييييييييييييير

من الناس يسموها صرافة؟؟؟

الين متى والشباب  لمن مثلا يتفقوا  يروحوا  يتعشوا في مطعم ايطالي

تلاقي فيهم واحد يعارض بقوه و يبغى يتعشى معصوب؟؟؟؟  ( ترى

ما اقصدك يا مستر معصوب )

الين متى والبنات مستمرين في الفشخره و احنا بس نتفرج… نتفرج

ايه..فيه كمان رجال ينافسوا البنات و الحريم في الفشخرة.

الين متى و كثير من الحريم والبنات تلاقيهم في عز اناقتهم اذا رايحين

جواز او عزيمه ولكن  اذا كانوا في البيت و قدام رجالهم يكونوا بمنظر

ما يعلم فيه الا الله سبحانه و تعالى.

الين متى والكلاب جالس يزيد عددها في الممشى اللي ورى الشيراتون

في جده عشان كل بنت تتدلع كلبها و تناديه .. بوبي حبيبي تعال

.

.

يا ولد هات الشيشه

To all Mothers

مارس 22, 2009

الاجر عند الله رب العالمين

مارس 13, 2009

من حط ثقله و ارتحل فوق الهزيل

ما يبلغ المقصود و الدرب الطويل

طبع الهزيلة تنحني تحت الثقيل

يوم البكر تظهر و معدنها يبين

ما بنفعك بالاجل وارضى بالغرام

و الاجر عند الله رب العالمين

اشكال فيها تنخدع مثل السراب

تنغر في الخارج وفي الداخل خراب

لا تخدعك ذيك المظاهر و الثياب

مهما تزين ولبس الغالي الثمين

ما بنفعك بالاجل وارضى بالغرام

و الاجر عند الله رب العالمين

كلمات:تراث

مقامات العشق

يناير 15, 2009

d8aad8afd986d8aad8b22

في هذا العالم الصغير تجد كثير من الناس قلوبهم كبيره

و لكن لا يحتملوا  ان يكون  بداخلها الكثير من الناس…  فهم اناس تعودوا على

عدم الاكتراث بالبشر و لا مخالتطهم  بالرغم من اعجابهم بالكثير و الكثير سواء

كانوا من الحيوانات او النباتات و يظلون غرباء في هذه المجره التي ربما في يوم

من الايام تصطدم بمجره اخرى في هذا الكون و بعد الاصطدام يولد عالم جديد

يحتوي علي غيرهم من البشر و الحيوانات و النباتات.

عندما تشرق الشمس في مكان ما  … تكون قد  غابت عن مكان اخر.. و هكذا

هي احوال المحبين و قلوبهم.. فعند مغادره احدهم من قلب احد.. فهم يدخلون

قلبا اخر ربما يكون اكثر محبه لهم وربما اقل .

روز… الورده  الحمراء التي سوف اهديها في كل سنه..بل كل شهر…لا لا لا

من الافضل ان اهديها في كل اسبوع و كل ساعه وكل دقيقة… بل ساهديها

في كل ثانيه الى حبيبتي المرهفه التي تعشقني و اعشقها الى حد الثمالة.

عود.. كمان.. بيانو قديم.. و ناي من  الخشب .. سوف اعزف بهم معزوفات

الحب على  مقامات قلبيه لايعرفها سوانا .. مقامات  فريدة ليس كالتي عرفها

البشر.. ليست على الحجاز او البيات ولا حتى الصبا ،، تذكري .. ايقاعات

لا يعرفها سوانا.

مع غزه

يناير 12, 2009

banner