Archive for the ‘شي واقعي’ Category

اللهم بلغنا رمضان

يونيو 22, 2012


 

الحمــدللـه الـذي منحـنـا الصحه و العافيه .. والذي خلقنا مسلمين

أسـأل الـله العلي القـدير ان يـبـلـغنا و أيـــاكم شهر رمضان الكريم

غير فاقدين ولا مفقودين ، اللهم اغفر لنا و ارحمنا وعافنا و اعف

يـاكـريم . الـلهم اشف جميع المسلمين والمسلمات و اغفر للأحياء

مـنهم و الأمـوات وصـل اللهم على سيدنا محمد وعلى آله وصحبه

أجمعين.

Advertisements

جو Go

يناير 3, 2011

قبل حوالي اسبوع كنت محتـاج لايصـال خـدمه الانترنت الى مكتبـي

بالاضافه الى رقم هاتفي ، وبما انني في القائمه السوداء في شركة

الاتصالات السعودية بسبب خطآ في فاتورتي والتي وصلت الى ٣٦٠٠

ريال مع ان الحد الائتماني ٣٠٠ ريال فقـط ، المهـم كان الخيار الوحيـد

امامي هو الاشتراك بالخدمة مع شركة اتحاد عذيب او جو go كما هو

متعارف عليهم.الاشتراك معهم كان في غايه السهوله و التعامل الذي

وجدته من الموظف كان جدا راقي وشفاف من ناحيه الاستفسارات و

تجاوبه معي ، واهـم نقطه لديهـم هي توفير المـودم مع رقم هاتفـي

يمكن الاتصال منه او عليه في اي وقت ومن اي مكان في العالم.

بعد التجربه كانت هناك مشكله تعتبر نوعا ما و هي عدم استقبال اي

اتصال من اي رقم موبايلي حتى الاتصال بآي رقم موبايلي غير ممكن.

 واحب اشكر التعاـون الكبيـر الذي وجـدته من خدمه العملاء في الرقـم

وبعد انتهاء المكالمه وصلتني رساله على الايميل ورساله على الجوال

تبين رقم الشكوى وطريـقه المـتابعه.. والحمدلله تم حل المـشكله في

اقل مـن ٢٤ ساعه ..شكـرا جو go و اتمنى مـن مشغليـن الهـواتف ان

يتعلموا و لو القليل من طريقه الخدمه المقدمه من جو

ليش كذا

نوفمبر 5, 2010

امس وانا واقف في الاشارة المرورية لمحت شي غريب .. صورت الحدث
وياليت تشوفوه معايا

ركزوا كويس

وفي النهايه

بالله ايش رايكم؟؟؟ وصل الاستهتار لهذي الدرجة؟؟ انا هنا ما الوم الشركة

الوم الشخص اللي بيسوق السياره او المسؤول عن فريق التسويق .. كلكم راع و كل مسئول عن رعيته.

اللقافة

يونيو 27, 2010

انت ليش ما تغير سيارتك؟؟

غريبه ليش ما سافرتوا في الصيف؟؟

عيالك ليش ما تنقلهم مدرسة غير اللي هم فيها؟؟

مليون سؤال و سؤال الناس يوجهوها لبعض و السبب معروف وهو حب اللقافة.

اللقافة هي حب التدخل و معرفة كل الاشياء الخاصة بآي شخص او محـاوله

التدخل في شئون الاخرين. اليـن متى و العالم تتدخـل في امـور الناس و تبدي

رآيهـم حتـى لو محد طلب منهم ابداء رآيهـم ؟؟ هـل هـو مرض او داء ممـكن

نلاقي له اي دواء .. و لا هو من ضمن الصفات الوراثية اللي نتوارثها من ابائنا و

اجدادنا زي الشكل و الاخلاق؟؟

طيب اهم سؤال ليش احنا العرب مشهورين باللقافة بينما الاجانب كل واحد في حاله؟؟

افيدوني آثابكم الله

نهايه مخزية

فبراير 25, 2010

اصدقاء من قديم الزمن يتفقوا على فكره معينه  تتحول هذه الفكرة الى  دراسة

ثم وضع اهداف وبعد كذا بدء في تنفيذ مشروع صغير يحمل فكرة الصديقين .

تعب البدايه و  اخـلاص  فـي و تفاني في العمل .. محاولة حل بعض  المشاكل

التي تكون  في بداية اي مشروع … تفاهم ما بعده تفاهم  و انسجام رائع في

العمل .. وبعدين ايش يصير؟؟

اول  ما يبدآوا الاثنين جني  النجاح و الربح .. تبدآ المشاكل و يبدآ الحسد وكل

واحد  يلـوم الثاني على اي غلطة … و تبدآ  النفوس تتغير الى ان يكون هناك

اصطدام بين الاثنين.. احنا ما اتفقنا على كذا..انت قلت اول.. وهذا مو شغلك.

هذا  الشي من مهامك، شوية شوية يبدا المشروع في التدهور وبعد كذا الوضع

يكون اشبه بكارثه والنهاية متوقعه .. خسارة المشروع . من اكثر المشاكل اللي

بـتوصـلني في المكـتب هي مشاكل الشـراكة في المشاريع  الصـغيرة وللاسف

٩٥٪ منهم  لم يقوموا بكتابه اي عقد شراكة بينهم او اي ورقه تحفظ حقوق اي

طرف وكآن زيارة محامي لكتابة عقود بينهم محرمه او ممنوعة،صحيح ان اي

موضوع في البداية يكون صغير ولكنه مع الايام باذن الله  يكبر ، قال تعالى:

آوفوا بعـهد الله اذا تعـاهدتم ولا تنـقضوا الايمان بعد تـوكيدها وقد جعلتم الله

عليكم كفيلا ان الله يعلم ماتفعلون. صدق  الله

العظيم.

سيول جدة

ديسمبر 4, 2009

كان يوم الاربعاء ٢٥ /١١ من  اسوآ الايام اللي مرت على جدة و على وطننا الحبيب

الامطار كانت طبيعيه ولكن اللي ماكان طبيعي هو اللعـب اللي حصـل  في  شبكـات

التصريف والنصب اللي حاصل من زمان وجائت هذه الامطار و فضحت كل شيء.

ناس غرقت و ماتت .. الشوارع غرقت ..  السيارات فوق بعض و كل شخص شاف

مناظر يمكن محد شافها الا في الافلام السينمائية.

بكت  جدة و  بكت قلوبنا  واحنا نشوف  جدة بتغرق والناس  غرقوا معاها  .. و كل

مسئول نايم في العسل ولمن صحوا كل واحد صار يلقي اللوم على الثاني.

الشباب  و البنـات في  جدة ماقصروا وصار تجمعهم كل يوم في مركز المعارض و

يجمعوا  التبرعات العينية عشان  يوزعوها  على الناس ا لمنكوبة و  رغم التـعب  اللي

هـم فيه تيخلوا يجـوا ناس  بدال ما يسـاعدوهم و هـم في  امس الحاجة الى اي يد

تمـتد عشـان تساعد.. نلاقي هذه الفـئه اللي محسـوبة على الدين  بتـحاول  تخرب

علـى الشبـاب و البنـات في مساعـدتهم للناس..  هل هذا  من الدين؟؟ انك تلاقـي

ناس فـي امـس الحـاجة للمساعدة و تـروح تخرب علـيـهم و تشـوش علـيهم  فـي

عملهم؟؟ مصـيبه ثـانيه اننا  بنـشوف ناس بدال ما تـدعي  الله انه  يخفـف  علـى

المنـكوبـين و يصـبروا اهل المتـوفين بنلاقيـهم يقـولوا يسـتاهلوا اهل  جـدة  لانـهم

اهـل الذنـوب و الـضلال .. لاحـول  ولا قوه الا بالـله ..   بس اعـرف ايـش  اللـي

قاهـرهم في اهـل جـدة؟؟ اهـل جدة اهل  خير  و محبـة و عـمرهم ما كرهوا احد

وفي النهايه يجوا المتخلفين يقولوا هذا الكلام؟؟

اللهـم  ارحـمنا  برحـمتك  و اسقـنا سقـيا  رحـمة  لا سـقيا عـذاب و اصـرف عـنا

الوباء و ارحمنا برحمتك يا ارحم الراحمين.

رمضان مر بسرعه

سبتمبر 18, 2009

السنة هادي شهر رمضان المبارك مر علينا بشكل جدا سريع

يادوب امس  كنا نبارك للاهل و الحبايب قدوم الشهر و اليوم

قدنا في نهايته…

نسـآل الله عز و جـل ان رمضان  ينعاد علينا اعواما عديدة و

سنين مديدة كلها خير و بركة.

خلاص باقي كم يوم على العيد..و كل سنه وانتوا طيبين  من

بدري وقبل الزحمة وربي انشالله يتقبل صيامكم و قيامكم  و

صالح  الاعمال و يبارك لكـم في الـعيد و ربي يجعل ايامكم و

ايامنا كلها اعياد و ياحظ  الطلاب اللي  اتمددت اجازتهم بس

ياريت بس  يستـفيدوا في الايام الباقية من الاجازه  و يبطلوا

كتر النـوم و اللفلفه في الاسـواق ورى  البنات و الجـلسة  في

القهاوي و يوشوفوا حاجة تفيدهم.

والبنات كمان ياريت يبطلوا فلانة قالت و فلانة سوت،خلاص

ما تعبتوا من الرغي و الحش.. روقوا شويه.

و السلام ختام.

رد على احد التعليقات

سبتمبر 11, 2009

اليوم و انا اتابع الردود  في المدونه في موضوع (الين

متى ) لقيت احد الردود و بصراحه انصدمت في طريقة

التعليق  و  الاسلوب  في الكتابه و ياليت  بس   تقرآوا

التعليق اللي تركه الاخ او الاخت و اعرف رآيكم.

التعليق الذي كتبه الزائر :

والله العظيم

موضوع سخيف جدا .. !!

نعم سخيف .. !!

تركت كل المواضيع ورحت للصرافة والمعصوب والمطعم الايطالي ؟!

طيب اتكلم على طيحني .. الكدش .. الترقيم .. المصخره .. السربته ..

الشرب .. الرقص .. !!

جاي تتكلم على البنات ماسكين كلابهم ولا على الحريم يقولو عيب

عشان زوجها لما يمسك يدها !!

هذا تفكيركم يا عرب وربي مستحيل تتقدمو ..

تفكيركم في الحظيظ ومستحيل تتطورو ..

فكر فكر فكر .. شوف موضوع يشفعلك يوم القيامة .. يوقف معاك ..

اتكلم عن الصلاة عن المصخره اللي حاصله .. مو تتكلم عن الممشى والمعصوب ..

وربي شي يقهر .. لا ومتعب نفسك كمان ..

يمين بالله عمركم مارح تتطورو ..

آسف على الكلمة اللي رح اقولها

لكن ” ماعندك شي ” وصدقني ولا كأنك سويت حاجة ..

وعلى فكرة وربي لا اعرفك ولا تعرفني بس شدني هذا الموضوع وياريتني

ماقريته .. عفوا رح اقفل صفحتك لاني توقعت اشوف شي يفيدني ..

انتهى.

واضح  من الرد  ان  الشخص  اللي كتب  التعليق انسان يمكن

يكون متشدد او معقد بعض الشيء  او من انواع  البشر  اللي

مايعجبها اي شي …. اخي الكريم  اول  شي احب اوضحه لك

اني كشخص افتخر  بكوني انسان عربي مسلم واذا انك شفت

ان الموضوع  سخيف  فصدقني  ان  كل  شخص  يرى  الناس

بعين طبعه  و  معناه  ان  الانسان  السخيف   او  القبيح   راح

يشوف  كل  شي  سخيف و قبيح… و بالنسبه للمواضيع ترى

اتكلمت عن  مواضيع  كثيره و منوعه و احاول  قد ما اقدر اني

انوع  في المـواضيع  اللي اقـوم باختيارها  للزوار  الكرام  في

مدونتي المتواضعه و البسيطه . واما عن مواضيع  الكدش  و

التـرقيم و طـيحني  و الشرب و الـرقص  فهذي  مواضيع   قام

الكثيرين من الاخوه و الاخوات الكرام في مناقشتها قبلي و قد

تكلمت عنها قبل فترة.

وعلى تفكيرنا كعرب المفروض انك على الاقل تفتخر ولو بشي

بسيط من عروبتك وانا اتكلمت عن شي اشوفه حاصل امامي

فـي المجتمع  العربي  اللي انا عايش  فيه و اذا كنت انت في

الحضيض و تفكيرك في الحضيض اتمنى ان لاتشملنا  معك

في تفكيرك .

و مره ثانيه احـمـد الله  انني  انسـان مسلـم  عربي متبع  لسنه

نبينا محمد صلى الله عليه و سلم و اسآل الله ان يجعل رسوله

الكريم شفيعا لنا يوم القيامه.

و انا مستغرب ان الموضوع اللي كتبته قهرك زي ما اتفضلت و

كتبت في تعليقك ، واذا كان قهرك فعلا اتمنى من الله عز و جل

ان يشفيك من القهر ا و الوسواس القهري الذي فيك و باذن الله

سبحانه و تعالى راح  تتـطور امـتنا و تنهض على  يد  ابنائها

المخلصين المستوعبين لكل شيء من حولهم و اذا انا ماعندي

شي في نظرك  اتمنى انك  تروح  تشوف شي ينفعك و يشغلك

عن مهاجمه الناس و احب اطمنك  اني ان  شاء الله مستمر في

الكتابة و انا اسـف اذا قـسيت عليك في ردي واتـمنى انك تكون

انسان تفـكيرك منطـقي و لا تشغل نفسك في اتبـاع الموضه و

معانده الشباب واذا ما عجبتك المدونه ياليت تعتبرها مثل اي

قناه تلفزيونيه ما تعجبك وبامكانك تغير و تشوف قناه ثانيه

و السلام عليكم و رحمة الله.

اشياء في خاطري اقولها ٧

أغسطس 7, 2009

قلة الذوق و من العقوق لمن تشوف شاب طول بعرض ماشي ز ي الاهبل

وتلاقي آبوه جمبه يشيل مليون كيس او غرض في يده و الشاب بيتفرج.

..

مصيبة لمن البنت بتكون مصاحبة شاب و امها عارفه بس ساكتة و تعمل

نفسها ما تعرف.

..

ليش البنات صاروا اشطر من الشباب و بكتيييييييييييير ؟؟

..

استغرب لمن اشوف شباب و المسجد جمبهم والناس بيصلوا وهم جالسين

بيدخنوا ويشربوا شاي.

..

على سيرة التدخين ربنا انشالله يوفق كل واحد ناوي يبطل دخان و

رمضان ياشباب و همتكم و خلوا السجاير او الزقاير على قولة ناس وناس

..

فيه ناس لها اطباع غريبة في الاكل تخيلوا واحد من الشباب اطباعه مرررة

غريبة في الاكل…. تصدقوا انو ياكل الهمبرجر وبدال الكاتشب يحب يحط

مربى بالبرتقال.

مايكل جاكسون R.I.P Michael Jackson

يونيو 26, 2009

we will miss you

michael%20jackson

We are the World

Billie Jean

Rest In Peace

ID_jackson_m_10.JPG

الاقنعة

يونيو 7, 2009

العفويه في التعامل اصبحت شي من الماضي او من الاساطير …. اليوم

صاروا الناس لابسين اقنعة في و جيههم و بيظهروا و يتعاملوا مع الناس

بعكس ما يخبوه في داخلهم. وقليل اللي تشوفهم يقول لك ترى  انا اللي

في قلبي على لساني.

الناس اتغيرت و القلوب اتغيرت و الاخلاق كمان اتغيرت و بعد كده يجوا

يقولوا و الله الزمن اتغير،،،، الزمن ما اتغير ابدااااا،،، الناس هم اللي

غيروا نفسهم بنفسهم.

زمان الواحد كان بيتعامل مع الناس بكل عفويه و اريحيه،،،، الحاره

واهل الحاره كانوا زي العيله الوحدة ، وكان بينهم الاحترام و  الثقه

اللي بتخلي الكل مطمن. وانا عارف دحين و انتوا تقرآوا الكلام دا

تقولوا الله على زمان وايام زمان

واقع مخزي

مايو 1, 2009

قبل كم  يوم و انا اتصفح  في  احد المجلات الشبابية   استوقفني  موضوع

بصراحه ماراح اقول  عنه الا انه مخزي او يفشل  و كل شي وهو  اذا  كتبت

كلمة Arab او حددت اي جنسية عربية للاسف ماراح يطلع لك الا المشاهد

الجنسيه او الفضائح  او مقاطع  التهديد ولا راح تلاقي  اي موضوع مفيد الا

بنسبه لا تتجاوز ٣٪ . من جد فضييييييييييييييييييييييييييييييييييييييييييحه.

ليش ما يكون تفكير شبابنا و بناتنا انهم يظهروا  بشي يشرفهم و يشرف بلدهم؟

وهل  كل  شبابنا  ممكن اننا  نطلق عليهم الداشرين ؟ اتمنى  من  الشباب  و  البنات

انهم  يحملوا المقاطع الهادفه و المشرفه لهم عشان نظهر للعالم بشكل مشرف و طيب.

sorry

أبريل 24, 2009

To all my Visitors

i am sorry because i was busy

with a lot of marketing campaigns

i promise you.. i will be with you

during this week

Thank you

MOHAMMED BIN SALEM

الين متى

مارس 25, 2009

الفقره هدي كان اسمها الى متى بس قلت لازم ارجع و اسميها بلهجتنا

الحجازية الحلوه ويعني حيصير اسمها الين متى؟؟ يلا نبدآ و بسم الله

الين متى  وبعض الحريم لمن ازواجهم  يبغوا يمسكوا يدهم في الشارع

يقولوا عيب؟

الين متى وبعض الرجال يسوي انه جنتل مع الناس الغرباء ومع اقاربه

تعامله زي الجزمه؟؟

البطاقة اللي  تسحب فيها فلوس من الصراف اللي مالي كل  الشوارع

اسمها بطاقة الصرف او السحب الالي.. بس الين متى كثييييييييييييير

من الناس يسموها صرافة؟؟؟

الين متى والشباب  لمن مثلا يتفقوا  يروحوا  يتعشوا في مطعم ايطالي

تلاقي فيهم واحد يعارض بقوه و يبغى يتعشى معصوب؟؟؟؟  ( ترى

ما اقصدك يا مستر معصوب )

الين متى والبنات مستمرين في الفشخره و احنا بس نتفرج… نتفرج

ايه..فيه كمان رجال ينافسوا البنات و الحريم في الفشخرة.

الين متى و كثير من الحريم والبنات تلاقيهم في عز اناقتهم اذا رايحين

جواز او عزيمه ولكن  اذا كانوا في البيت و قدام رجالهم يكونوا بمنظر

ما يعلم فيه الا الله سبحانه و تعالى.

الين متى والكلاب جالس يزيد عددها في الممشى اللي ورى الشيراتون

في جده عشان كل بنت تتدلع كلبها و تناديه .. بوبي حبيبي تعال

.

.

يا ولد هات الشيشه

الاجر عند الله رب العالمين

مارس 13, 2009

من حط ثقله و ارتحل فوق الهزيل

ما يبلغ المقصود و الدرب الطويل

طبع الهزيلة تنحني تحت الثقيل

يوم البكر تظهر و معدنها يبين

ما بنفعك بالاجل وارضى بالغرام

و الاجر عند الله رب العالمين

اشكال فيها تنخدع مثل السراب

تنغر في الخارج وفي الداخل خراب

لا تخدعك ذيك المظاهر و الثياب

مهما تزين ولبس الغالي الثمين

ما بنفعك بالاجل وارضى بالغرام

و الاجر عند الله رب العالمين

كلمات:تراث